La revista añal de l’ALLA presenta nesti númberu un importante cambeu d’imaxe respeuto a los anteriores.

Esta tardi preséntase n’Uviéu el númberu 39 de la revista Lliteratura. La cita ye a les siete la tardi na llibrería Matadero Uno d’Uviéu.

La revista, asoleyada pola Academia la Llingua Asturiana con motivu del XLIV Día de les Lletres Asturianes (2023), cuenta con testos poéticos, narrativos y ensayísticos, de los que se va lleer una amuesa nel actu de presentación.

Nel actu, que va moderar Xosé Ramón Iglesias Cueva, van presentar y facer llectura de les sos contribuciones los y les autores Laura Marcos, Gonzalo G. Barreñada, Aida Escudero y Daniel García Granda. 

Destaca nesti númberu, amás de la so gran calidá lliteraria espardía nes sos 104 páxines, el cambeu nel diseñu de la portada, que por primer vegada nun amuesa’l so clásicu fondo prietu con lletres blances, marcáu con llinies verticales blanques y marielles, sinón que tien una portada azul celeste con debuxos de delles costelaciones zodiacales. 

Susana Sela

This work is licensed under a Creative Commons Attribution 4.0 International License.