Nel tercer trimestre, de xunetu a setiembre, 13.400 asturianos más quedaron en paru, con un total de 60.000 desemplegaos, lo que ye una medría del 28’68 por cientu respectu al segundu trimestre.Con ello, la tasa de paru xubió n’Asturies del 10,45 al 13,09 por cientu, bien perriba del 11,84 estatal.

Amás, Asturies vuelve a dir a la contra de los datos estatales, cuando estos son positivos, perdiendo mil puestos de trabayu, ello ye, 0’26% menos cuando n’España se crearon cuasi un 1% más, acordies la Encuesta de Población Activa (EPA) espublizada pol Instituto Nacional de Estadística (INE).

Ello, demientres la temporada turística taba en plenu apoxéu nun branu nel que se presumió de “batir tolos records de turismu”, lo que demuestra otra vuelta que’l turismu nun ye la solución a los problemes llaborales d’Asturies. Nin siquier la incorporación de docentes en setiembre foi quien a dar vuelta a la tendencia negativa en creación d’emplegos.

Aparte, demuéstrase qu’anguañu n’Asturies tener trabayu nun implica salir de la probitú, por mor de la precariedá llaboral marcada, precisamente, polos trabayos estacionales nel sector servicios.

Alberto Rodríguez

This work is licensed under a Creative Commons Attribution 4.0 International License.