Llucía F. Marqués
Tornaron los aviones al cielu xixonés. Esta vegada, lloñe d’escuchar les demandes de los ciudadanos, vinieron por duplicao, con sesión nuecherniega, y en más desixente, multando a la xente por bañase na so sablera. Agora ya sabemos que mos pueden bombardear a escures, mientres que nun mos bañemos
El Festival Aéreu Internacional traxo otra vegada a Xixón decenes de máquines de guerra coles que traten d’amosar la cara “amable” d’unos artefautos diseñaos pa matar eficientemente, guiaos por persones que dediquen la so vida precisamente a ello. Tornó l’añal esibición de potencia bélica con tastu a menacia, na que l’exércitu español protagoniza una demostración de fuercia, gastu inxustificáu y contaminación -acústica y atmosférica-, financiáu con un presupuestu desconocíu apurríu por istituciones públiques y privaes, que tienen comu envís la normalización pente la población d’estes máquines de matar, utilizaes en multitú de conflictos bélicos en tolos puntos del planeta para finar con vides humanes y afitar los porgüeyos del sistema.
Pa facer entá más macabru l’actu y más bultable la menacia, esti actu cellébrase siempres alrodiu’l cabudañu del entamu del bombardéu de Xixón -y otres ciudaes asturianes- por parte de los exércitos español y alemán, nel añu 1937, cuando 15 meses de bombardeos por mar y aire dexaron miles de muertos civiles.
Xixón paralizaóse esti domingu pa ellos y miles d’espeutadores miraron pal cielu embaecios ensin plantegase la correción moral o la llectura política que tien emocionase con aparatos de matar.
Comu daños collaterales esti bombardéu propagandísticu dexó esti añu, amás de los avezaos rapacinos y animales apavoriaos y los quilos de polución, un escaparate rotu poles vibraciones de los aparatos y delles persones multaes por querer bañase, con un sol d’espatarrar y la mar como un platu, demientres los ensayos. Esperpéntico ver la bandera roxa y los socorristes, comu antidisturbios, a pié de mar torgando la entrada al agua a la xente que quier entrar; la policía tuvo d’intervenir, sacar pela fuercia a los bañistes frustraos, multar… nun fuere a cometese’l delitu de bañu o a despistase un pilotu viendo a una bañista.
Quiero facer una mención especial a La Vida Alegre, establecimientu qu’escolingaba ayeri el cartelu de “Presllao por aviones”, negándose a presenciar la parafernalia militar “Nun apetez nin convivir ni competir col ruíu apabullante y los demás disparates de la horterada aérea, convertía últimamente en feu vezu del branu llocal. Trátase d’un escesu militarista, contaminante y desagradable en xeneral, que alloña cualisquier posibilidá de descanso o tranquilidá en dellos kilómetros a la reonda. Aconséyase a cualisquiera que puea que s’aparte de la ciudá durante la so realización”. Bien resumio.
This work is licensed under a Creative Commons Attribution 4.0 International License.
