La pesca, la biodiversidá marina ya’l paisaxe mariñán asturianos cuerren seriu pelligru de llevase a cabu el proyeutu, que nun podría facese si Asturies tuviere protexía por una moratoria eólica
la vixente Llei 41/2010, de 29 d’avientu, de proteición del mediu marín (BOE n. 317, de 30/12/2010) recueye nel so artículu 4, lletra f, comu contaminación marítima “toa introdución direuta o indireuta nel mediu marín de sustancies o enerxíes de resultes de l’actividá humana, incluyíes les fontes sonores submarines, que provoquen o puedan provocar efeutos nocivos, como perxuicios a los recursos vivos y a los ecosistemes marinos –incluyida la perda de biodiversidá–, riesgos pa la salú humana, torgues a les actividaes marítimes, especialmente a la pesca, al turismu, a les actividaes d’arruelu y demás usos permitios de la mar, asina comu alteraciones de la calidá de les agües marines que llinde’l so usu y un amenorgamientu del so valor recreativu, o en términos xenerales un acabamientu del usu caltenible de los bienes y servicios marinos”.
Abulta nidio quefasta cien eólicos marinos, a 21 km de la costa, con bases de 25 metros cuadraos llantaos en suelu marín va estorbar abondo a la biodiversidá, a les actividaes marines, a la pesca ya en resumen al mediu marín, másime cuando se apreben zones dientru dientru de reserves pal caltenimientu la biodiversidá marina.
El seutor pesqueru convoca en rempuesta una concentración esti sábadu 18 a les 12’l mediudíi delantre la Delegación de Gobiernu, n’Uviéu, en defensa del so mediu de vida.
Esta situación evitaríase d’esistir la moratoria eólica qu’Andecha desixe al Gobiernu de Barbón y pa la que recueye sofitos con una campaña de recoyía firmes en Change.org, qu’agora treslladen a les Cofradíes de Pescaores asturianes pa que se sumen a esi mesmu pídíu. “Les Cofradíes de Pescaores deberíen ser les primeres interesaes n’algamar esa moratoria, porque dalgunos de los efeutos que tendría la esplotación marítima de la enerxía eólica nel ecosistema marín faen qu’esta actividá, al nuesu paicer, cumpla les condiciones pa ser declará actividá industrial contaminante”, declararon.
Pel so lláu, y na so llinia de sumisión a les decisiones tomaes en Madrid, el presidente del “Principado” espresó la so satisfacción porque “Asturies ye una de las cuatro comunidaes peninsulares nes que se identificaron zones con recursos enerxéticos aprovechables”
La cuestión va tratase’n fondura’l prósimu vienres 31 de marzu nun alderique que tendrá llugar nel Conceyu la Mocedá de Xixón so’l tema “Enerxía eólica ¿Tamién na mar?” nel que s’informará del tema, cola participación de representantes d’Andecha Astur -organizadora del alderique-, les cofradíes de pescadores, la Direición Xeneral de Pesca y dos grupos ecoloxistes.
This work is licensed under a Creative Commons Attribution 4.0 International License.
