Carme Pérez Antolín: “Nos escasos cinco meses que-y queden de mandatu a l’actual Alcaldesa de Xixón, nun va poder nin siquiera facer naguraciones, porque malpenes hai nuevos proyeutos en marcha na ciudá”
Xixón, la ciudá más dinámica y poblada d’Asturies, ta sumida nuna parálisis nesta cabera llexislatura municipal. Esa ye la realidá.
Dengún progresu nos proyeutos importantes que deberíen da-y impulsu. Dengún avance nel metrotren, nin nel vial de Xove. Nada sobro l’autopista del mar. Dengún plan valiente qu’aborde la contaminación na zona oeste… y asina podríemos siguir n’otres estayes como la cultura, l’ociu, la residencia universitaria, ambulatorios, escueles infantiles, etc.
Nel caberu debate sobro l’estáu del conceyu, foi llamentale’l lloriquéu al faer blance final de la so xestión, señalando que “mi propio partido ha preferido relegarme en beneficio de otra persona a la que considrera más apropiada”.
Yá tienes que facelo rematadamente mal pa nun continuar nel cargu otros cuatru años –ye’l primer casu nel Ayuntamientu de Xixón que l’Alcalde o Alcaldesa nun repite otra llexisltatura- y pa enriba que seyan los tuyos los que t’echen.
Y ye que’l PSOE –la ‘Empresa’ como lu denominen coloquialmente los sos militantes n’Asturies- nun pue permitise perder votos nel graneru que tien en Xixón.
La Sra. González pasará a la hestoria –por pocu tiempu, porque malpenes va dexar buelga en Xixón- por una política de movilidá centrada na guerra declarada al coche –ensin alternatives pa les clases populares- y en dar la espalda a la ciudadanía.
Lo suyo ye un fracasu dafechu en cuantes a participación ciudadana. Eso sí que Xixón nun lo perdona.
Carmen Pérez Antolín
This work is licensed under a Creative Commons Attribution 4.0 International License.
