Les declaraciones del Presidente, rescamplando la importancia de la escuela rural, contrasta cola política aplicao pola so Conseyería d’Educación

Nel actu de clausura del XIV Foru Comunicación y Escuela, entamáu pola estaya de Lengua Castellana del IES Elisa y Luis Villamil de Vegadeo, Barbón destacó la escuela como “focu vertebraor y dinamizaor” del mediu rural”

La Conseyería d’Educación del so gobiernu suprimió, namás esti añu, 27 y 31 clases d’infantil y primaria respeutivamente, bona parte d’elles en fasteres rurales. Tres Colexos Rurales Agrupaos (CRA) presllaron dafechu esti cursu, unviando a los rapacinos a colexos de llocalidaes mayores; en concretu son los de Valle Naviego y Santarbás, en Cangas, ya’l de Villayón.

Los avezaos retayos y complicaciones col tresporte escolar  afeuten, poro,  a munches más families, afalando ensin dubia a abandonar los pueblos o faciendoles desistir de dir a vivir a ellos.

Aparte, el cursu entamó ensin que se cubrieren bona parte de les places, lo que si ya ye llacerioso en colexos grandes, ye inasumible en colexos rurales, ensin profesoráu de guardia y con un altu porcentaxe d’interinidá.

Barbón sabe que “les escueles son  imprescindibles p’asegurar la supervivencia del mediu rural y plantar cara al retu demográficu”. Por eso les preslla.

Llucía F. Marqués

This work is licensed under a Creative Commons Attribution 4.0 International License.