• Portada
  • >
  • Llingua
  • >
  • Iniciativa pol Asturianu va participar na Xunta Xeneral d’ELEN en Cárdif  

Iniciativa pol Asturianu va participar na Xunta Xeneral d’ELEN en Cárdif  

  • 28 Ochobre, 2022

Xosé Álvarez, vocal de la organización, va presentar el trabayu de la entidá amás de falar del estáu del idioma

La Rede Europea d’Igualdá Llingüística (ELEN), organización llíder n’Europa na protección y promoción de llingües minorizaes, va celebrar la so xunta xeneral en Cárdif na postrer selmana d’ochobre. L’eventu, nel que va participar Iniciativa pol Asturianu, agospiarálu’l Gobiernu de Gales y la Universidá Prifysgol Cymru y Drindod Dewi Sant, axuntando a representantes d’organizaciones de calter llingüísticu de toa Europa na capital galesa.

La xunta xeneral va entamar el vienres 28 d’ochobre con una receición oficial nel afamáu Templu de la Paz en Cárdif, con un discursu de bienllegada del alcalde la ciudá, Huw Thomas. Ente los convidaos atópense organizaciones miembro d’ELEN, ONGs en calidá d’observadores, diputaos del Senedd (parlamentu galés), representantes del Gobiernu galés, d’instituciones internacionales y medios de llingua galesa.

El sábadu 29 d’ochobre’l Gobiernu galés abrirá la xunta xeneral con una presentación de bones práutiques na preservación de la llingua galesa y de la so política estrella, ‘Cymraeg 2050’, col oxetivu d’algamar el millón de falantes de galés pa 2050.

Darréu habrá un panel sobre comunidaes llingüístiques sostenibles con ponentes d’ONGs y del gobiernu onde falarán de temes qu’afeuten al galés y a otres llingües minorizaes, y cómo abordalos.

Na so ponencia, la Comisionada Asistente de la Llingua Galesa, Gwenith Price, falará del trabayu de la oficina del Comisionáu con enfotu n’afitar estándares.

Activistes pola llingua irlandesa de Conradh na Gaeilge van aldericar de los grandes llogros desendolcando l’irlandés nel norte d’Irlanda col restablecimientu de comunidaes de fala irlandesa nun contestu urbanu, los postreros resultaos del censu amosando una xuba nel númberu de falantes y la llexislación pola llingua irlandesa que ta agora aldericándose nel Parlamentu británicu. Una cuestión sedrá por qué esta campaña afitada na comunidá y nos drechos foi tan efeutiva y qué lleiciones puen deprender los miembros d’ELEN d’ella.

El panel sobre la Década Internacional de la UNESCO poles Llingües Indíxenes cuntará con ponentes del Conseyu d’Europa, los nuevos miembros d’ELEN Linguapax International, la Universidá de Cardiff, y la ex-diputada del Parlamentu européu por Plaid Cymru, Jill Evans. Van aldericar alrodiu del papel de les ONGs europées n’afitar una comunidá global pola preservación, revitalización y sofitu de les llingües indíxenes del mundu.

Una novedá nesti añu ye’l taller d’activistes. Les organizaciones que formen parte d’ELEN son les organizaciones activistes llingüístiques llíderes n’Europa y axunten esperiencia abondo. El taller va enfotase nes campañes de trabayu, llogros y árees de meyora. Van aldericase dellos enfoques pal trabayu esitosu de les organizaciones como la interseicionalidá, l’enfoque basáu en drechos comunitarios, manifestaciones y trabayu de sofitu. Nesti apartáu, Xosé Álvarez, vocal de rellaciones internacionales d’Iniciativa pol Asturianu, va presentar el trabayu de la organización a lo llargo d’estos años y va faer una esposición sobre la situación actual del idioma.

El secretariu xeneral d’ELEN, Davyth Hicks, añadió: “Ye emocionante aconceyar en Gales, un país llíder mundial en polítiques esitoses de preservación llingüística y col oxetivu agora d’algamar el millón de falantes pa 2050”. “Con tantes organizaciones llingüístiques de toa Europa viniendo a la capital galesa, la Xunta Xeneral d’ELEN afita la duradera conexón ente les organizaciones de la llingua galesa y Europa, una conexón que sedrá vital nel nuesu oxetivu común pola recuperación llingüística dafechu”. “Agradecemos al Gobiernu de Gales tol so sofitu y naguamos por una rellación de trabayu cercana con ellos nel futuru”.

Nota pa periodistes: ELEN ye la ONG internacional que trabaya pola promoción, proteición and bientar de les llingües territoriales d’Europa. Representa cincuenta llingües con 174 miembros en 25 estaos europeos.

La xunta xeneral d’ELEN cunta col sofitu y collaboración del Gobiernu de Gales y la Universidá de Gales Trinidá San David.

La rueda de prensa de la Xunta Xeneral sedrá’l sábadu 29 d’ochobre a les 11 hores nel hotel Mercure nel centru de Cárdif.

Alberto Rodríguez

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies