Andecha Astur pidió nel 2020 que se xixilare de cerca l’actividá de NMR polos sos turbios antecedentes y la so implicación en dellos negocios sospechosos, incluyendo’l tratu de favor nes operaciones carboníferes n’El Musel
Nel añu 2019 Vauste ye revendía al fondu de los Emiratos Árabes DSA, al traviés de la so marca Natural Mining Resources (NMR), empresa con domiciliu’n Madrí qu’el so únicu alministraor de NMR nun tien más esperiencia que la de ser xixilante nuna mina asturiana de carbón, polo que s’albidra que pudiere ser un testaferru.
NMR entardá namás unos meses en presentar un concursu voluntariu d’acreedores, roblando prauticamente la lliquidación de Vauste. Andecha Astur denunció entós los turbios antecedentes de NMR y alvirtió la so implicación en toles estayes de la trama’l carbón, pidiendo un mayor control sobro lo que llamen la “trama carbonífera”.
Lloñe d’atendese esa pidición, en 2020 NMR foi el principal operaor de carbones d’El Musel, en perxuiciu de la empresa d’estiba con titularidá semipública, EBHI, moviendo cerca de cuatro millones de tonelaes, siendo la so cimera actividá la compraventa de carbón internacional. Ello foi posible gracies a qu’esa empresa recibió de l’Autoridá Portuaria de Xixón (organismu de titularidá pública) una cesión de 10.000 metros cuadraos nos que criba carbón foriatu, mécelo con escories y reviéndelo, moviendo más carbón del que xeneraron en so díe les mines asturianes y dexando n’evidencia la falcatrua de les intenciones ecolóxiques de la “descarbonización”.
A finales del 2020 NMR entamó a apinar impagos. N’avientu’l 2021 entró en concursu d’acreedores, declarando una deuda de 101,32 millones d’euros, a los qu’habría de sumase reclamaciones de proveedores y veceros pendientes de resolvese.
Agora ye Endesa Generación la que se querella contra Natural Mining Resources 1926 (NMR), pol presuntu usu de documentación bancaria fraudulenta na alquisición d’escedentes de carbón de térmiques d’Endesa, en procesu de preslle por descarbonización. Aparentemente, NMR presentó ante Endesa xustificantes de trasferencies bancaries falsificaos pa poder llevar el carbón qu’esta empresa tenía almacenao n’El Musel y na térmica d’Almería, ensin que les perres aportaren enxamás.
El cobru va ser difícil, una bones los principales activos de NMR son 63,54 millones de euros que supuestamente-y deben veceros, pero la cuasi totalidá d’esos veceros son empreses venceyaes con socios de NMR o del so únicu alministraor, polo que se consideren incobrables.
Amás de la d’Endesa Generación hai otra querella almitía a trámite contra NMR, la de Caolines de La Espina pola supuesta estracción illegal d’arcilla d’una concesión minera d’esta empresa nel conceyu de Salas.
Llucía F. Marqués
This work is licensed under a Creative Commons Attribution 4.0 International License.
