El prósimu 12 d’ochobre Andecha Astur cellebrará el tradicional homenaxe a la revolución asturiana d’ochobre del 34 con una duple visita a los cimenterios de Pando, au descansen los restos del Presidente Belarmino Tomás, ya’l de Carbayín, onde s’alcuentren enterraos los 24 Mártires
La fecha del 12 d’ochobre ye la escoyía pa esti homenaxe, tanto por asitiase metanes del periodu revolucionariu asturianu, como pola sinificación que pa los españoles tien esa xornada, na que cellebren una “Hispanidá” nidiamente venceyada al conceutu más colonialista de lo que ye España.
La primer cita sedrá a les 12 hores nel cimenteriu Carbayín, onde tan enterraos los 24 homes que fueron asesinaos depués de la ofensiva que los trabayaores de la cuenca del Nalón llevaron a cabu nos primeros díes de la revolución.
La segunda, a la una y media na tumba de Belarmino Tomás, na que se reconocerá’l protagonismu qu’esti home tuvo n’Ochobre del 34, primero, y como presidente del Conseyu Soberanu, dempués.
Con ellos quier representáse a tol pueblu asturianu, que tuvo’l valor de defendese frente al exércitu de la República Española, y que tuvo en Belarmino Tomás l’interllocutor que negoció énte esi exércitu republicanu español una rindición pautada, que llueu los españoles nun respetaríen, protagonizando una represión sangrina y xabaz.
Dende Andecha Astur ven naquellos fechos hestóricos un exemplu a siguir “frente al proyeutu d’esfarrapamientu, esaniciu, paru, precariedá, emigración forciada de la mocedá y asimilación colonialista que l’Estáu español tien entamáu p’Asturies.”
Tamién comparen esti momentu hestóricu, nel que’l Pueblu Asturianu, declaró la República Obrera y Campesina d’Asturies frente a la República Española dimpuestu a arriesgalo too pola so llibertá, colos “probes esparabanes políticos protagonizaos anguañu por un gobiernu enfotáu en poner parches a un modelu d’Estatutu, fallidu ya impuestu, que los asturianos nun tuvimos siquier drechu a votar”
Nuria Prendes
This work is licensed under a Creative Commons Attribution 4.0 International License.
