L’asociación Asturies Ganadera y la Coordinadora de Montes Vecinales en Man Común d’Asturies, xuntu con 30 comunidaes vecinales. reclamen al Principáu la devolución de los montes comunales a los sos llexítimos dueños
La dificultá pa xestionar los montes d’usu coleutivu, que son los Vecinales en Man Común y Proindivisos, ye un importante factor llimitantes pal so aprofitmientu con garantíes per parte de la población de la zona.
Les alministraciones, que son quien tendríen d’ufiertar soluciones, reclamen dende les comunidaes vecinales, tán demostrándose incapaces de realizar los trámites burocráticos que se riquir, llegando en munchos casos a atrabancar y a remar a contrasen.
Representantes de delles comunidaes afeutaes concentráronse ayeri frente al edificiu de conseyeríes pa lleer un manifiestu nel que soliciten la titularidá de los sos montes, criticando duramente’l mal furrulamientu del Xuráu de Clasificación y apuntando a la responsabilidá del Gobiernu.
Pa ellos el retrasu na tramitación de les solicitúes presentaes polos vecinos con torgues innecesaries y la falta d’información a los afeutaos per parte del Xuráu de Clasificación ye intencional. Acusen tanto a Adrián Barbón, presidente del Gobiernu, como a Alejandro Calvo, como conseyeru de Mediu Rural, de frayar reiteradamente normes y lleis, ignorando la obligación llegal d’incentivar la devolución de los montes comunales, entepasando los plazos, resolviendo “con cuentagotes” les clasificaciones… too ello sobre un mediu rural yá “castigáu por polítiques ayenes a la sensibilidá que rique’l campu”.
Les alministraciones esploten estos tarrenes económicamente o cobren cánones d’aprofitamientu pol so usu, polo que nun ye d’estrañar que s’atrabanque la so reconocencia y devolución a manes vecinales, llegando al puntu d’entrar en conflictos xudiciales.
La resultancia ye que se ta torgando a les comunidaes rurales el drechu a xestionar les sos propies tierres, pero tampoco les tán utilizando pa beneficiu d’estes comunidaes, quedando en munchos casos esbardiada la bayura’ n recursos de los pueblos , dando llugar al deterioru y abandonu de mediu rural.
Poro, desixen que mientres s’implementen los medios pa llevar a cabu d’oficiu les clasificaciones, s’asígne un equipu nuevu específicu pa la istrucción de Montes Vecinales en Man Común que cunte “con presupuestu y téunicos, xurídicos, economistes ya historiadores imparciales, y abondos pa sacar los espedientes que vaigan siendo solicitaos nos dos años que marca la norma”. Tamién alvirtieron de que d’equí p’arriba van recurrir al Defensor del Pueblu cuando s’entepasen los tiempos normativos, y al Parlamentu Européu de la que proceda.
Na concentración taben presentes vecinos de les comunidaes de Abraido, Abres, Braña Les Murias, Busfrío, Buspaulín, Los Carriles, Castañéu, Les Collaes, Fonteta, Fuentescavadas, La Figuerina, Llanuces, Modreiros, Nieres y Grandamuelle, El Coríu, Pendueles, Presno, Pumariega, Robléu, San Esteban, San Fructuoso, San Pol, Santolaya, Soto Les Regueres, Sueve, Tarna, Tsamaraxil, Villabona, Villatresmil, amás de representantes de la Coordinadora de Montes Vecinales en Man Común d’Asturies y Asturies Ganadera.
Vitor Corte
This work is licensed under a Creative Commons Attribution 4.0 International License.
