• Portada
  • >
  • Opinión
  • >
  • Adrián Barbón torna a dar llargues a la Oficialidá del Asturianu na primer sesión del Debate d’Orientación Política

Adrián Barbón torna a dar llargues a la Oficialidá del Asturianu na primer sesión del Debate d’Orientación Política

  • 28 Ochobre, 2020

Trataré de facer torna de les poques pallabres del Presidente no que cinca a llingua y oficialidá

Les declaraciones d’Adrián Barón al respeutu del asturianu na primer sesión del Debate d’Orientación Política llendáronse a mencionar que “Asturies tien de tar arguyosa de la so cultura” y, pidiendo nun se dexar llevar por prevocaciones, “buscar un consensu tresversal sobre’l modelu d’oficialidá que más p’alantre se pueda treslladar al Estatutu d’Autonomía”. La frase, por muncho que Xose Antón González Riaño, presidente de l’Academia la Llingua Asturiana quiera interpretala comu “avanzar ensin rodeos haza la oficialidá”, tien pocu d’avanzar y muncho de dar rodeos.

Pa entamar, los drechos nun s’algamen por consensu, de ser asina tendríemos entá a media América perdía n’alderiques cruzaos sobro la conveniencia y manera d’abolir la esclavitú. Los drechos deféndense, desíxense y reconócense. Pa seguir, tenemos la falacia del “modelu d’oficialidá”. La oficialidá ye o nun ye, falamos d’un conceutu llegal nidiamente afitáu y qu’implica unos drechos concretos y nidios, pero equí quieren vendenos una oficialidá “amable” de tiesta gacha y que nun estorbe muncho; tornando al exemplu anterior, que dexaren de llamanos esclavos pero que sigamos faciendo-y la cama al señoritu. Seguimos: “que más alantre” ¿y por qué non darréu? ¿A qué vien allargar más esta agonía?; pero atención, que lo meyor vien agora “al Estatutu d’Autonomía”. Dexando a un llau el fechu de que l’Estatutu que carecemos, impuestu y nun votáu, ye una llábana qu’arrecostinamos los asturianos, si dexamos la reforma l’Estatutu pa “más alantre” ¿De qué tábemos falando? ¿Ónde y cómo piensa aplicar anicialmente esta “oficialidá discreta” si lo del Estatutu lo dexa direutamente pa prau?.

Per otru llau, la cultura y quiero creer qu’equí fala non solo de la llingua, si non del mui escaecíu pero bayurosu padremoñu cultural, arquiteutónicu, etnográficu, musical y artísticu en xeneral del país, nun se caltién con arguyu a seques. Caltiense con enfotu, sofitu ya inversiones, pero eso queda tamién pa otru día.

Propongo una torna cenciella de les pallabres de Barbón: “Vamos dir diendo a pidir permisu pa entamar a falar sobre como y onde nos dexen los amos falar asturiano y cuando nos dexen, si nos dexen, entamamos a mirar si nun futuru lo facemos llegal, pero ensin priesa, eh, que nun queremos estorbar”.

Y nun escaezamos lo de nun retrucar a les provocaciones de los matones del patiu, la tiesta gacha comu norma, a nun ser pa les semeyes.

Llucía F. Marqués

 

 

 

This work is licensed under a Creative Commons Attribution 4.0 International License.

2 Comments Already

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies