Volotea suprimirá esti iviernu les rutes con Mallorca, Ibiza, Menorca y Murcia, entantu Vueling incumple l’alcuerdu de 3 vuelos selmanales a Londres que tien contratáu
El “Principado” pagará a la compañía de vuelos Volotea 3’1 millones d’euros pa que garantice dica’l 2024 la conesión pente Asturies y Málaga, Sevilla, Alicante y Valencia, rutes nes que ya operaba anteriormente. Al mesmu tiempu la compañía elimina otres cuatro rutes que tinía’n furrulamientu. Ello ye, que se-y pagará por caltener la metá del sirviciu que ya ufría anteriormente.
Pel so llau, Vueling elimina la so conesión con Llanzarote ya incumple manifiestamente’l contratu’n vigor col gobiernu d’Asturies, pol que percibieren 1’1 millones d’euros a cambiu del so compromisu de coneutar Ranón con Gatwick con tres conesiones selmanales. De fechu, la compañía tien programaos namás un vuelu selmanal con destín a Londres dica fin d’añu, ensin que se conoza intención dala por parte del “Principado” de reclamar el cumplimientu del alcuerdu.
Redaición InfoAsturies
This work is licensed under a Creative Commons Attribution 4.0 International License.
