• Portada
  • >
  • Economía
  • >
  • La investigación y teunoloxía, un camín pal emplegu de calidá n’Asturies

La investigación y teunoloxía, un camín pal emplegu de calidá n’Asturies

  • 15 Setiembre, 2020

La Conseyería de Ciencia, Anovación y Universidá crea una Oficina de tresferencia del conocimientu pa sofitar a los investigaores y destaca la importancia de les empreses de bas teunolóxica na creación d’emplegu d’alta calidá

El pesu de les empreses de bas teunolóxica n’Asturies va ganando emportancia, con 208 en furrulamientu y otres 40 “Spin off” (proyeutos derivaos d’otru anterior) de les que’l 65% nun tienen orixen nel ámbetu empresarial, sinon nel académicu. La bioteunoloxía ya’l entornu dixital son les principales estayes nes que trabayen estes empreses. Sicasí, entá hai un bon porcentaxe de proyeutos d’investigación que se queden nos llaboratorios asturianos ensin aplicación práutica por falta d’inversión. Per otru llau, esisten fondos europeos a los qu’estos proyeutos podríen aceder, amás d’un mercáu internacional al que ye necesario poner en contautu con estos investigaores.

El científicu – teunolóxicu ye un sector económicu capaz de crear emplegos de calidá, fixando n’Asturies la so población más formada, polo que’l so interés rebasa lo científico, siendo tamién económicu y social. El caberu pasu recién dau pola  Conseyería de Ciencia, Anovación y Universidá pa facilitar la salía al mercáu de les investigaciones asturianes, aumentar el númberu d’empreses de bas teunolóxica, Pymes anovaores y “Spin off” ye la puesta en marcha una “Oficina de tresferencia del conocimientu”. Nesta Oficina orientaráse  al personal investigaor que trabaya n’Asturies na so salida al mercáu, al traviés del Centru Européu d’Empreses ya Anovación (CEEI).

Informen tamién a los investigaores de la esistencia d’un premiu entamáu  pol CEEI, dotáu con 18.000 euros y dirixíu a aquellos que desendolquen la so actividá profesional en centros teunolóxicos públicos y privaos asturianos, premiu que podría ampliase con una segunda distinción pa proyeutos venceyaos a la xestión del COVID-19.

Llucía F. Marqués


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies