Les amueses, una dedicada al ciclu de la sidre y otra a los llagareros, son obra de Xurde Margaride y podrán vese del 1 al 10 de Setiembre na Plaza Conceyu de Villaviciosa
Tres de la suspensión, forciada poles circustancies sanitaries, de la XXIII Fiesta la Sidre de Villaviciosa prevista pa esti sábadu 5 de Setiembre, el Conceyu de Villaviciosa col sofitu del Conseyu Regulaor de la D.O.P. Sidre d’Asturies y de la Carpintería y Tonelería Hermanos Argüelles ufren dos esposiciones de semeyes cientraes nel universu sidreru.
Nuna d’elles Xurde Margaride pon cara a la sidre, con una serie de retratos en blanco y prieto de los llagareros qu’hai tres de la sidre que d’avezu participa na Fiesta maliaya. La otra ye parte de l’amplísima coleición de semeyes coles que Margaride lleva inmortalizando ca ún de los pasos de la ellaboración y consumu de la sidre dende va años. Nella, baxo’l nome “La Nuesa Sidra” fae un percorríu enllenu collor pelos pumares y llagares de Villaviciosa fasta llegar al españíu de llume que recueye na sidre echao.
Los puestos nos que d’avezu s’echa la sidre nel festival sedrán el soporte perfechu pa les semeyes d’esta esposición qu’entama güei mesmo.
Llucía F. Marqués
This work is licensed under a Creative Commons Attribution 4.0 International License.
