Tres años xubiendo’l preciu del Güerna

  • 30 Decembro, 2019

Demientres les autopistes d’España van pasando a ser de baldre, el peaxe del Güerna xubi a 13,50 euros pa vehículos llixeros

Con tolos sos pilancos, siendo l’autopista más pelligrosa l’estáu col triple d’acidentes que la media, cuadriplicando l’indiz de mortandá y resultando inutil ca vegada que ñeva, l’Autopista del Güerna ye la única vía afayadiza pa viaxar a la Meseta dende Asturies. Imprescindible pa tresportistes y con un tráficu mediu diariu de 30.400 viaxeros, ye de fechu una de les más utilizaes del estáu.

Esti añu, por tercer consecutivu, xubi’l preciu, pasando de los 12’90 nel 2017 a los 13’50 nel 2020. Ello implica un aumentu del 1,12 por cientu na AP-66, pente Campumanes (Asturies) y La Madalena (Llión), acordies información d’Aucalsa. De les autopistes estatales qu’entá nun foron lliberaes, nueve nun subirán de preciu esti añu ya’l restu fadránlo la metá de lo que xubi’l peaxe asturianu.

El peaxe del Güerna ye un de los principales pilancos al desendolcu del tresporte n’Asturies, y un de los motivos que ta llevando a les empreses tresportistes a abandonar el país camín de Madrid, Llión o Santander, llugares más competitivos pa exercer el so llabor. Esta autopista ye una auténtica barrera, ya que les condiciones de les otres salides a la meseta nun permiten el so usu seguru, continúu y masivu, polo que’l pidíu de que s’elimine’l peaxe ye costante na sociedá asturiana dende va décades.

Seique anicialmente’l Güerna finaba la so concesión nel añu 2021, lo que permitiría l’anulación del peaxe nun plazu de menos de 2 años, l’ampliación de la mesma al 2050 siendo Francisco Álvarez-Cascos ministru de Fomentu allarga fasta los 75 años la duración del peaxe que xune (o separta) Asturies y la Meseta. El rescate abulta caru al estáu español y el “Principado” niégase a subencionar les tases.
Pel so lláu, l’actual executivu del “Principado” argumenta que nel so programa elleutoral la midía propuesta yera “l’estudiu de posibles bonificaciones a los usuarios ”, desdexando la fueya de ruta aprebada pola Xunta Xeneral nel 2018, na que s’incluyía la gueta de métodos llegales que permitieren anular el contratu de concesión.
El coste d’esta autopista foi presupuestáu na so naguración, nel 1983, en 420 millones d’euros; la concesionaria Aucalsa gana más de 500 millones al añu, reinvirtiendo en conservación un escasu terciu d’esos beneficios.
Llucía F. Marqués

 

 

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies