Pa cumplir los oxetivos n’I+D  plantegaos pola Estratexa 2020 de la Comisión Europea tendríen d’invertise 710 millones n’Investigación, Desendolcu y anovación en 2020

L’Indicador Rexonal d’anovación, que la Comisión Europea vien de presentar, analiza la situación de 238 rexones y países de la Xunión, amás de Noruega, Serbia y Suiza, allugando a Asturies nun puestu bien per detrás de la metá: el 178, con namás 60 rexones per detrás en toa Europa. Dientro l’Estáu español, el Pais Vascu y Cataluña ocupen los primeros puestos, tando Asturies tamién a la cola a nivel estatal.

Esti indicador tien en cuenta dellos aspeutos: formación continua, proporción d’universitarios, espublizaciones científiques, anovaciones en procesos productivos y patentes. De toos estos datos, Asturies namás saca bona puntuación en persones con estudios superiores, estaya na que s’alluga pente los 30 meyores d’Europa y les 4 meyores del estáu.

Nel caberu informe, del 2017, onde Asturies taba na posición 150, los espertos ya anunciaben que’l retrocesu yera inasumible. Los nuevos datos afiten qu’Asturies va tenelo abegoso pa cumplir los oxetivos d’I+D que marca la Estratexa 2020 de la Comisión Europea, que prevé una inversión del 3% del PIB a esi separtáu. Sedría preciso cuadriplicar l’actual inversión en menos d’un añu, subiendo fasta los 236’5 millones la partida en I+D+i de l’alministración y multiplicando por cincu l’aportación de les empreses.

Llucía F. Marqués