El Festival Escena Festín entama güei la so quinta edición, en Samartín del Rei Aureliu, con un ampliu programa d’espeutáculos de cai

Del 6 al 9 de Xunu la reciella tien una cita en Samartín del Rei Aureliu, onde podrán esfrutar d’una bona variedá d’espectáculos pensaos pa ellos, la mayoría na mesma cai, abarcando’l teatru y la danza más contemporaneos, maxa, humor, títeres, payasos y pasucais, averando al públicu propuestes novedoses de xeneros variaos a lo llargo de cuatro intensos díes.

La organización del festival cuerre a cargu’l direutor, actor y dramaturgu Borja Roces, col sofitu de la Conceyalía de Cultura y la collaboración de Tras la Puerta Títeres.

La inauguración del FESTIN arranca güei mesmo, xueves, en Blimea, col xuegu d’animación “Al circu” de Tras la Puerta Títeres, pensáu pa los más piquiñinos -fasta 3 años- y siguirá mañana col magu y clown Adrián Conde, que a les siete y media la tardi llevará l’humor y la maxa de “El gran Braulio” a la plaza la iglesia de Sotrondio.

El sábado el festival desplázase a L’Entregu con un doble espeutáculu del Show “Caxes máxiques y  barraques de feria”, que pente les 5 y les 7 y media protagonizarán El Circo-lo nel parque La Llaguna, y del Grupu de Teatru Los Pintores y Kamante Teatro, que representarán el Tornasol nel kiosku. Esa mesma tardi, na plaza la ilesia, podrá esfrutase de la danza contemporánea col show Play again, de Proyecto Piloto Cia, Rebeca Tassis, al que siguirá l’espectáculu “Ella yera yo”, d’Ana Serna y Lauren Atanes.

El domingu 9 de xunu el festival tornará  a Blimea y tará dedicáu a payasos y bicicletes, cola esibición Biciclown, de Pablo Picallo, que tendrá llugar na plazoleta de la ilesia de Blimea, a les 12 hores.

Amás de la programación de cai, la compañía Nun Tris ufrirá un espeutáculu de danza tradicional con adautación contemporania, ¿Aire?, nel Teatru Municipal del Entregu a les ocho la tardi.

Redaición InfoAsturies

This work is licensed under a Creative Commons Attribution 4.0 International License.