Lléxicu mariñán, seguridá na mar, identificación d’especies, talles mínimes y vedes, nuedos, pesca a fondo, pesca a boya… esos son dalgunos de los temes que la reciella deprenderá na XI edición de los Talleres de Pesca de Carreño nos díes 24 y 29 de xunu
Cola programación d’estos talleres preténdese que la reciella s’avere a la pesca, non solo comu arruelu, sinon mui especialmente pa apurriyos conocimientos qu’anantes pasaben ñaturalmente de vieyos a mozos y qu’agora cuerren pelligru de perdese pol amenorgamientu del trabayu na mar. Tamién recibirán información importante sobro les especies ya’l mediu marín, concienciándolos de la importancia de la so proteición y de la gravedá del problema de contaminación de los mares, asina comu de la necesidá de protexer los espacios naturales y crear un desendolcu caltenible.
Los talleres, a los que se podrán apuntar nos díes 3, 5 y 7 de Xunu, tienen un preciu 5€, y estrémense en dos grupos: los de reciella tan empobinaos a rapacinos d’ente 6 y 10 años y los de pesca inclusiva a persones con dellos graos de diversidá funcional apuntaos nel Cientru d’Apoyu a la Integración de Candás.
Redaición InfoAsturies
This work is licensed under a Creative Commons Attribution 4.0 International License.
