Nel 211 aniversariu de la declaración de Soberanía Andecha Astur revindica los fechos hestóricos y los conteníos políticos del 25 Mayu de 1808

“Porque fueron, somos, porque somos, sedremos. Más de dos sieglos faciendo país”- Llucía Fernández-

Va 22 años qu’Andecha Astur cellebra el so díe coincidiendo colos conocíos los fechos acaecíos el 25 de Mayu del 1808, nos que baxo la presión del pueblu asturianu la Xunta Xeneral declarábase Xunta Suprema, reconociendo esplicitamente la soberanía asturiana, xurando caún de los sos componentes que’l “poder, tol poder, reside y procede del pueblu”, y declarando en consecuencia la soberanía ya independencia d’Asturies, no que costitúi’l primer actu d’autodetermín d’Asturies na dómina contemporánia.

Pente los estremaos actos dedicaos a esta efemérides destaca un homenaxe al 25 Mayu de 1808 cola colocación a la una y media de la tardi d’un ramu lloréu a les puertes de la Sala Capitular, n’Uviéu, onde tuvo llugar la mencionada declaración de Soberanía. Darréu cellebraráse una espicha popular nos llocales de la organización n’Uviéu.

Nuria Prendes

This work is licensed under a Creative Commons Attribution 4.0 International License.