Falar de crisis ye tema recurrente n’Asturies (minería, siderurxa, naval, demografía, mundu rural, etc.) Güei la prensa señala lo que podría ser l’entamu d’otra crisis, la qu’afeuta a la Escuela Pública asturiana
SUATEA alvierte que les informaciones referíes a la fase de preiscripción para’l próximu cursu 2019-2020, señalen que solamente na contorna d’Avilés, la escuela alcordada llevaríase, de confirmase los datos, un 45% del alumnáu de nueva incorporación na etapa d’Infantil.
Consideren la tema como un asuntu d’evidente gravedá yá que esti datu significa que, de cara al prósimu cursu, del total de places ufries pola Escuela Pública, namás van llegar a cubrise la metá de les mesmes, afondándose d’esta miente na fonda crisis nel sector educativu públicu.
SUATEA siempres se manifestó a favor de la supresión de los conciertos educativos (entamando pelos centros de llocalidaes nes qu’hai ufierta pública abonda) señalando que la Escuela Pública tendría de furrular como una rede única capaz de garantizar una enseñanza universal, igualitaria, inclusiva, llaica y calidable pal conxuntu de la población escolarizada.
Esta defensa de la Escuela Pública ye pa SUATEA un de les sos exes centrales, si non el principal, de la so intervención cotidiana. Ye por esto qu’esti plantegamientu apaez recoyíu en tola so documentación, dende los Programes elleutorales, intervenciones en Conseyos Escolares, etc. Precisamente va pocos díes aldericóse esti mesmu asuntu nel Conseyu Escolar del Principado (CEPA) a cuenta de les enmiendes de meyora presentaes pol sindicatu.
Tamos énte un ciclu electoral nel que, insisten dende SUATEA, van tomase decisiones sobro temes bien importantes, siendo un d’ellos la reversión de los retayos pa volver garantizar que la Escuela Pública cumpla en condiciones coles funciones que la sociedá encamiéntanos al personal docente. Amás de los sos contactos colos equipos directivos de los centros de la zona d’Avilés y contorna, SUATEA va apellar a los candidatos de les distintes fuerces elleutorales, municipales y autonómiques, pa que se pronuncien al respective de los conciertos educativos y les midíes necesaries a adoutar pa garantizar que la Escuela Pública pueda desendolcar la so actividá nes meyores condiciones. Siempres defendimos que la educación de los nuesos menores nun puede ser un negociu.
Asturies ta sobrada de crisis y nun precisa amontala añediendo nuevos sectores. “Entendemos que na nuesa comunidá, el futuru de la educación pasa pol reforciamientu de la rede pública, garantizando los recursos necesarios pa una ufierta universal y calidable tantu a nivel humanu como material”.
Redaición InfoAsturies
This work is licensed under a Creative Commons Attribution 4.0 International License.
