Coscientes del mal que los ocalitos faen al entornu, de la so escasa rentabilidá y de la peligrosidá d’estos árboles comu propiciadores de quemes, el Conceyu de Ribadeba en collaboración con FAPAS (Fondu pa la Proteición de los Animales Xabaces) ya EDP ta desendolcando un proyeutu nel que s’arrincará la especie invasora, llantándose nel so llugar árboles propios de la fastera, de les mesmes especies qu’orixinariamente poblaben la biesca Pimiango. Destaca pente ellos la presencia d’encines, árbol consideráu típicu de climes mediterraneos, por ser el centenariu encinar de la Cueva’l Pindal y la ermita de San Emeterio una interesante esceición.

Fasta agora son más de 20.000 los árboles replantaos, pero el trabayu pendiente nun fina con sustituyir el restu d’ocalitos: el conceyu comprométese a desendolcar les llabores de caltenimientu qu’aseguren el correchu xorrecimientu d’esta nueva biesca y la restauración del valor ecolóxicu de la fastera.

La iniciativa inclui tamién un trabayu esperimental d’investigación que va a la gueta de meyores téuniques d’eliminación d’ocalitos, un trabayu especialmente costosu, y de meyora del xorrecimientu de les especies autóctones en tarrenes perxudicaos pola alta demanda de nutrientes de los ocalitos.

Esti ye’l primer conceyu en decidise a retirar los ocalitos de les finques municipales, pero espérase que valga d’exemplu pa qu’otros conceyos asturianos se xunan a la cruzada de finar con esta especie alóctona y dañible.

Nuria Prendes

This work is licensed under a Creative Commons Attribution 4.0 International License.