Los sindicatos denuncien que’l preslle de la Casa Sindical respuende a intereses especulativos y represivos “Estórbayos l’edificiu nos sos planes urbanísiticos y estórbayos lo que se mueve dientro”

Una barricada frente al hestóricu edificiu de la Casa Sindical protestaba ayeri pola menacia de preslle y esbarrumbe que s’escolinga enriba d’elli. L’argumentu pal so preslle: la necesidá d’unes reparaciones ensin mayor complicación que, amás, dependen del Ministeriu de Trabayu, (que ostenta la propiedá del edificiu) y lleven años siendo solicitaes polos sos ocupantes. Ello ye, que les autoridaes tan desixendo una clausura por cuestiones de les que son direutamente responsables. Tamién se yos pidi’l desagospiu del salón d’actos, anguañu ocupáu pol mercaín y almacén del coleutivu de Paraos y Precaries, a los que se-yos tien de buscar un nuevu agospiu.

Dende la C.S.I declaren que l’orixe hestóricu de la Casa Sindical de Xixón tendría de ser motivu abondu pa que fore respetada, catalogada, rehabilitada y puesta en valor comu bien cultural ya hestóricu de la ciodá. Llantada nel mesmu llugar nel que los trabayaores xixoneses llevantaren anantes de la guerra la Casa’l Pueblu de la CNT, lleva décades siendo utilizada por estremaes organizaciones y sindicatos de clase pa los sos actos y aconceyamientos, siendo un referente pa la llucha obrera asturiana, actividá esta que ye precisamente la que, según denuncien estos sindicatos minoritarios,motiva en parte l’enfotu de presllala, “basándose en supuestos informes que tienen más d’ideolóxicos que de téunicos”.

Pidin, poro, que se dexe la decisión del destín d’esti edificiu a les partes interesaes, ello ye, al so propietariu que ye’l   Ministeriu de Trabayu y los sindicatos agospios n’él, ensin más inxerencies.  Remembren tamién que la solución ta en manes del Ayuntamientu de Xixón, en cumplimientu del compromisu alcordáu nel conceyu del 4 de xunetu onde se decidió con tolos partíos políticos presentes buscar una propuesta llegal y presupuestariamente viable y paralizar el desagospiu del salón d’actos mentantu nun se articule una alternativa de reagospiu al coleutivu de Paraes y Precaries, desixéndose darréu al Ministeriu les igues correspondientes.

De nun haber cambios na postura del Ayuntamientu, anuncien nueves y más fuertes movilizaciones, a les que llamen a participar a la clas trabayadora y al pueblu de Xixón, de los qu’esti edificiu ye padremoñu.

Llucía F. Marqués

This work is licensed under a Creative Commons Attribution 4.0 International License.