Entrevista a Mariano Suárez

  • 3 Outubro, 2018

Mariano Suárez plasmó a los asistentes a la conferencia sobro’l Cuadonguismu n’Asturies del pasáu mes de setiembre cola bayura de datos hestóricos qu’apurrió y la so maxistral manera de combinalos pa dar una visión conxunta de la hestoria d’Asturies al traviés de les “Diez Cuadongues”. De toes menes, queriemos face-y dalgunes entrugues más pa que mos esclariare con mayor fondura dalgunos de los detalles

InfoAsturies : Na conferencia del otru díi dexaste a los asistentes ablucaos cola cantidá de datos qu’apurriste. ¿Cuáles son les tos fontes?

Mariano Suárez : Si daquién ablucó hai d’interpretar el socedíu con sinceridá. Nun foi de xuru porque hubiere intervención estraordinaria dala. Sólo podría debese a que les asturianes y asturianos nun tamos avezaos a ver una sucesión amplia de fechos hestóricos protagonizaos pol nuesu pueblu y cuntaos dende una óptica cenciellamente asturiana.

Bramente’l conteníu de la charra “¿Por qué Asturies tien 10 Cuadongues?” nun inclúi datos hestóricamente novedosos. El so conteníu ta a la disposición de cualisquier interesáu pola hestoria la nuesa nación, yá seya al traviés d’obres impreses o d’otres en formatu dixital, d’espublizaciones custodiaes en biblioteques públiques o a la venta nes llibreríes… Yo recurrí a la lletura de clásicos y tamién d’hestoriaores d’anguañu, sicasí ties de lleer permanentemente en dos planos: nun planu lliteral y n’aquel otru que s’asitía ente llínies. Porque cuasi siempres se mos cuntó la hestoria d’Asturies al traviés de los filtros d’intereses ayenos.

 

I.A: ¿Puedes facemos un breve resume de les falacies que se mos quieren vender sobre Cuadonga, Pelayo y les monarquíes…?

M.S: ¡Puf! Estripar milenta años de manipulación de la hestoria asturiana nunes poques llínies ye misión imposible. Pero intentémoslo…

La corona española, especialmente cuandu ta en manes de la dinastía borbona, y aidá de contino polos principales partíos políticos de ca dómina, siempres esplotó la memoria de Cuadonga y el lliderazgu d’un rei heroicu (Pelayo) comu’l pegoyu nel qu’afitar la restauración monárquica y una memoria nacional española.

La so estratexa política y el discursu hestoriográficu qu’habiliten pasa por desposeyer al pueblu asturianu. Apropiase de Cuadonga, apropiase del rei Pelayo, apropiase del Reinu los Astures permite a los Borbones apaecer nes sos restauraciones dinástiques con una llexitimidá que nun-yos pertenez: lo mesmo que Pelayo lliberó Asturies d’un invasor esterior, quieren facer creyer que sólo ellos salven al Estáu español de los Habsburgo, de los Bonaparte, de los Saboya, de la República, de Franco… y de cualisquier crisis identitaria española venía o por venir.

Trátese de la dinastía que se trate o del réxime español que seya, toos s’enfotaron na so midía en desposeyer al pueblu asturianu apropiándose del símbolu de Cuadonga. Asina’l mitu de Cuadonga foi monopolizáu ca vegá más por aquelles istituciones y grupos de poder españoles enfotaos en definilu comu un santuariu dedicáu a la monarquía española, a la xunidá nacional española y al integrismu relixosu.

Nes manes d’esta xente’l símbolu polisémicu de Cuadonga pierde la so complexidá y ye convertíu nuna ferramienta más de dominación identitaria. Porque queriendo desposeyer a Asturies del símbolu de Cuadonga quieren españolizar los debates del pueblu asturianu sobro la so identidá. Porque queriendo reducir Cuadonga a un simple símbolu de la “braera España”, nagüen porque Cuadonga nun tea disponible comu poderosu referente de la xunidá identitaria, cultural y política de les asturianes y asturianos

 

I.A: Mencionabes diez Cuadongues. ¿Cuála d’elles cuentes qu’inflúi más sol calter asturianu d’anguañu?

M.S : Puestos a escoyer, abúltame que cuayen bien col calter asturianu d’anguañu les Cuadongues que nomamos de 1934 y de 2003.

La Cuadonga de setiembre de 1934 representa aquella Asturies que, poco enantes de considerar necesaria la revolución d’Ochobre, sintióse obligá mesmamente a llevantase encontra l’actu qu’ellí convocare Gil Robles, el cabezaleru de la drecha española. Esa Cuadonga representa bien la tradicional resistencia a la dominación político que se da n’Asturies y la dinidá cola que’l pueblu asturianu encaria’l so futuru en momentos clave.

La Cuadonga de 2003 ye aquella que permitió, col esfuerciu xunitariu de xente nacionaliego de toa clas, presentar públicamente’l “Manifiestu de Cuadonga”, col que se vindicaba la rialidá nacional d’Asturies, el nuesu drechu a decidir, la necesidá de polítiques de reequillibriu social y la oficialidá del asturianu comu llingua d’Asturies. Esta Cuadonga de 2003 representa perbién la valoración del llabor a comuña, l’interés de consensuar unos puntos mínimos d’identidá nacional perriba les diferiencies.

I.A: Si tuvieres que comparar l’intre actual con dalguna d’elles, ¿con cuála sedría?

M.S. Pos torno a camentar na Cuadonga de 2003. Porque anguañu paez que tamién ye’l tiempu d’algamar un consensu sociopolíticu ampliu al rodiu d’unos valores asturianos básicos, comu aquellos que recoyía perbién el “Manifiestu de Cuadonga”. Paez necesario revitalizar una rempuesta xunitaria y abierta d’aquel tipu. Sí, porque cuandu analices les opciones que güei se mos ufren a les asturianes y a los asturianos dende les istituciones, nun topamos denguna que represente un discursu popular qu’apueste de verdá polos drechos d’Asturies y de la so xente. Tolo que ves son opciones que xueguen namái dientru les llendes afitaes polos intereses del estáu. Unes son ñidiamente defensores de la condición d’Asturies comu territoriu d’esplotación. Otres amuesen un discursu con ciertu tinte social pero que ñega dafechu la identidá de la nuesa nación. El casu ye qu’Asturies pa naide d’ellos ye un proyeutu vital nin un marcu propiu d’aición. Eso yera lo que denunciaba nel 2003 el “Manifiestu de Cuadonga”: el sometimientu d’Asturies a intereses ayenos. Y, poles mesmes razones, ufría, comu ye mester tamién güei, un marcu mínimu de consensos pal futuru d’Asturies.

 

I.A: Estremabes los fechos hestóricos en Cuadonga pente aquellos nos que fuimos ganaores y los que fuimos humildaos ¿En que categoría incluyiríes esta cabera visita real a Cuadonga, cola correspondiente protesta popular?

M.S: Dende 1857 los Borbones vinieron oficialmente a Cuadonga en trece ocasiones enantes d’ésta. A la gueta siempres del mésmu réditu políticu. Pero nesta ocasión, pal aterrizax de los Borbones en Cuadonga, los sirvicios de planificación estratéxico y de propaganda y protocolu del estáu español fexeron un esfuerciu descomanáu, comu poques vegaes se pudo ver. Resultó-yos necesario porque, según pasa’l tiempu, tienen más difícil vender comu llexítima una monarquía hereditaria que, al tiempu, ye heredera direuta del réxime de Francisco Franco Bahamonde, reconocíu pola ONU comu un réxime facista.

Pa paecer un réxime llexítimu los Borbones aterricen al pie de Cuadonga, fáense xubir ellí y fáense retratar ente tolos símbolos d’una Asturies que foi’l primer reinu peninsular tres l’esbarrumbu del poder visigodu, muncho enantes de qu’esistiere un estáu español. Fáense retratar ente la tumba de Pelayo, ente la so estatua, na cueva, ente la Santina, ente los nuesos picos y los nuesos llagos… Faen un despliegue de fuercies de seguranza descomanáu. Ponen micrófonos a un arzobispu pa que seya’l voceru principal de los sos intereses. Compren los sirvicios d’un gaiteru pa que la música’l so discursu suene a “asturiano”. Convierten el camín ente la basílica y la cueva nuna pasarela de Carolina Herrera. Naguren balcones nel monte pa enseñase ellí asomaos. Autoconcédense insinies de príncipes d’Asturies de la xoyería Quirós pa escenificar pomposamente’l sometimientu la nuesa tierra. Ponen autocares gratis pa xubir aplaudiores. Marafundien más d’un millón d’euros en toos estos fastos. Y resulta que cuandu vemos el NODO d’esa xorná topámosmos con que la esplaná de Cuadonga nun s’enllena xente, comu reconocieron ellos mesmos. Y, por si fore poco, espárdese rápido peles nueses cais el mensax que nun interesa en Moncloa nin na Zarzuela: República Asturiana, Asturies nun tien rei.

Por más portaes de prensa y telediarios que se dediquen al aterrizax en Cuadonga, el fracasu ye evidente. Nun tienen manera consiguilo: el so llinax nun ye asturianu y nun tien arume a Pelayo; el so llinax ye español y güel a esa momia que tovía conserven en Madrid, nel Valle los Cayíos.

 

I.A: La hestoria d’Asturies ye una gran desconocía pa los asturianos ¿Qué motivu hai pa ello? ¿Qué consecuencies tien?

M.S: Nel recorríu hestóricu que se fae col analís de les 10 Cuadongues, pervese qu’Asturies cunta con una gran cantidá de situaciones, episodios y presonaxes qu’afiten el determín d’esti pueblu a escoyer llibremente’l so futuru. Y los más d’ellos tuvieron tanta sinificancia política que, pal so sometimientu y dominación, al estáu español y a la so hestoriografía oficial resultó-yos imprescindible esborriar, tapecer o malinterpretar (nesti orden de prioridá) la nuesa hestoria. Nesta xera foi necesaria la complicidá activa de la esquierda española y los sos hestoriaores; nun podemos escaecer cómu mesmamente descafeinaben comu “enfotos rexonalistes” una declaración asturiana de soberanía y el llamáu a la ONU pa la reconocencia del nuesu Conseyu Soberanu de 1937.

La imposición d’un discursu oficial españoliegu, que taraza y manipula tola nuesa hestoria, y la tresmisión d’esi discursu al traviés de los medios de comunicación y del sistema educativu ye una de les causes pola que muncha xente asturiano nun pudo exercer el so drechu a conocer la propia hestoria d’Asturies.

¿Les consecuencies? Home, comu dicía Manuel Villar, los pueblos ensin memoria nun son ná. Y eso ye lo que se pretende: qu’Asturies nun seya ná, sólo un prau más pa pastiar ellos. ¿Les consecuencies? Pos unos medios de comunicación que siguen intentando llexitimar una monarquía escoyía por Franco o una Conseyería d’Educación del “Principado” que fae porque n’Asturies s’estudie a los Comuneros de Castiella mentantu escuende a Belarmino Tomás.

 

I.A: ¿Que llectures recomiendes a quien quiera deprender más sobre la hestoria’l nuesu país?

M.S: Asturies entá tien un décifit claru en cuantes a la tresmisión de la nuesa hestoria dende una óptica oxetivamente asturiana. Poro, anguañu ye mester lleer tolo que faiga referencia al nuesu país, vieyo o nueo, reinterpretándolo dende la nuesa manera d’entendemos comu asturianes y asturianos. Somos los únicos protagonistes de la nuesa hestoria y por eso tenemos la opción digna de señalar a quien la manipuló y tenemos el drechu llexítimu de narrala agora a la nuesa manera. Ufrir a la xente testos qu’amuesen con sinceridá asturiana la nuesa hestoria tien de ser una prioridá.

 

I.A: “Quien escaeció a Belarmino Tomás” ye un básicu na hestoria d’Asturies ¿Tas trabayando en dalguna nueva obra?

M.S: Güei non. Mañana quiciás yá sí, porque ta peteciéndome convertir en testu les razones de por qué Asturies tien 10 Cuadongues. Paezme que mañana, en cuantes abra un periódicu y vea otra vuelta cómu los azules, los roxos, los anaranxaos y los moraos tornen falar d’Asturies comu un paraísu ñatural pa venir ellos a pacer, mentantu la nuesa mocedá ye forciao a colar d’equí, voi prender l’ordenaor pa pega-y un repasu a les Cuadongues. Va prestame… Anque sólo seya por ser solidariu cola mocedá asturiano que ye obligao a vivir fora’l país, compartiendo con ellos la denuncia de les causes actuales y tamién los motivos hestóricos polos que se-y quier ñegar a Asturies un futuru llibre y dignu.

 

 

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies