La Xornada de protesta foi  un ésitu rotundu, con una participación d’un 90% na fuelga, los centros de Begoña y La Playa zarraos ya’l de Foro cuasi ensin actividá

Los trabayaores de los Burguer King de Begoña, Foro y playa de Xixón denuncien la precariedá llaboral que carecen nestos tres cientros, xestionaos pol Grupo Nalón. Pa ello protagonizaron ayeri una xornada de fuelga na que entamaron piquetes informativos a les puertes de los establecimientos.

L’escesu de trabayu deriváu pola falta de personal, xunto col incumplimientu continuau de los alcuerdos retributivos son dos de los principales puntos de la protesta, pero los emplegaos de la cadena de fast food denuncien tamién incumplimientos en materia de salú, como la falta d’equipos de proteición individual y la falta de vestuarios mistos afayaizos. El deficiente caltenimientu de los locales deriva, según los trabayaores, en serios problemas d’insalubridá y condiciones llaborales inadecuaes.

Pa finar, informen tamién de la vulneración continuada de los derechos de consulta ya información a los representantes de los trabayaores.

Llucía F. Marqués

This work is licensed under a Creative Commons Attribution 4.0 International License.