Oposición a un nuevu polígonu en Les Baragañes

  • 29 Marzu, 2018

La rede de saneamientu municipal yá resulta insuficiente para’l so actual usu, colo que l’añadíu de les agües residuales d’un nuevu polígonu nun ye asumible polos actuales sistemes d’evacuación


La Coordinadora Ecoloxista d’Asturies presentó allegamientos al proyeutu de la creación d’un nuevu polígonu en Les Baragañes (Villaviciosa) ensin un previu estudiu rigorosu del so impautu ambiental, plantegándose amás si ye procedente dende’l puntu de vista económicu ya paisaxísticu.
Seique na actualidá hai disponibles n’Asturies millones de metros cuadraos ensin utilizar, repartíos en 27 polígonos industriales, el Conceyu de Villaviciosa plantega la creación d’una nueva área industrial sobro 42.000 m2. N’esti mesmu conceyu hai otros 2 proyeutos de los que se lleven años falando, un na Rasa onde yá ta Sidra Mayador y otru el de Cazanes, en víes d’estudiar la so viabilidá xeolóxica, daqué que pa los ecoloxistes ye malo d’entender dada l’actual situación de contración económica, comercial ya industrial.
L’actual diseñu del sistema de saneamientu del núcleu urbanu yá xenera problemes coles xubíes de caudal provocaes por aumentos de precipitaciones o por pleamares, provocando derrames a la ría, polo que nun paez prudente añedir al caudal les agües residuales d’un nuevu polígonu industrial.

El coleutor que xestiona CADASA, impulsa les agües residuales escontra la depuradora de Rodiles, escurriendo pela marxe zorga de la Ría de Villaviciosa y ye frecuente qu’arrame’l so conteníu a la mesma, produciendo de manera avezada arramaos tósicos a la Reserva Parcial de la Ría de Villaviciosa, colos consecuentes daños a la redolada. Frutu d’estos arramaos ye’l zarru de la ría al marisquéu por contaminación bacteriana, dende va siete años.
Los terrenes nos que se proyeuta l’allugamientu del Polígonu son suelu fértil, llanu y non inundable. Na actualidá la mayoría del terrén, ta siendo utilizáu pa siega de pación y como plantíu de maíz, polo que, a la so dudosa rentabilidá y al problema de la contaminación de les agües habría de sumar la certidume del descomanáu impautu visual.

No que cinca al consumu de les agües, nun se sabe res de la cantidá d’agua necesario nel polígonu, yá que  se desconoz qué tipu d’industria va ocupar estes naves industriales, siendo les dos tomes d’agua potable pa suministrar al polígon, d’escasu diámetru y d’usu residencial.

Por too ello la Coordinadora Ecoloxista d’Asturies solicitó un estudiu con más rigor pa valorar la compatibilidá ambiental d’esti polígonu.

Redaición InfoAsturies

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies