L’actuación de los órganos de xusticia y de los cuerpos de seguridá del estáu español ente les denuncies d’abusos sesuales y/o malos tratos, poniendo en dulda a la víctima, prexulgándola, desacreditándola y acosándola lleven a munches persones a arrenunciar nes sos denuncies o inclusive a tarrecer presentales

Tres d’años de quexes per parte de les víctimes d’abusos y violencia acerca’l comportamientu de Ramón Vilalta, sicólogu forense de los xulgaos d’Uviéu, L’Asociación asturiana ‘Abogaes pa la Igualdá’ y l’organización internacional Women’s Link presentaron n’avientu del añu pasáu una querella na so contra, por un delitu siguíu d’odiu escontra les muyeres.

Denunciaben qu’esti profesional, qu’amás ye’l presidente del Colexu Sicólogos de Asturies, desacredita sistemáticamente nos sos informes el testimoniu de les víctimes, basándose en prexuicios como que les muyeres manipolien a los menores pa fadiar a les sos espareyes.

La querella presentada básase’n en cinco casos concretos, dos d’ellos por violencia contra la muyer y trés d’ellos amás con abusos sesuales a menores -dos per parte de los sos pas y unu pol güelu- que nun pudieron llograr xusticia polos informes d’esti psicólogu, nos que desacreditaba a les víctimes y acusaba a les muyeres de mentir y manipoliar a los sos fíos, dexando impunes a los acusaos. Sicasí, estos cinco casos son namás una amuesa, una y bones les citaes asociaciones tienen recoyíos más d’otros venti asemeyaos nos últimos años, toos na mesma llínia.

Sicasí, la querella nun foi almitida a trámite, yá que “nun s’atopen nicios de delitu penal na so actuación”. La decisión va ser recurrida.

Llucía F. Marqués

This work is licensed under a Creative Commons Attribution 4.0 International License.