Los niveles de contaminación ambiental nel conceyu ficieron saltar l’alarma delles vegaes esti añu y l’anterior
Na xunta, que ta convocada pal prósimu martes 5 d’avientu a les 19:00 hores nel Atenéu de La Calzada, van dase los datos oficiales de la campaña 2016 de midía de los niveles de partícules PM10 na estación midíora del Lloredal (Xixón), na que se confirmen les denuncies ciudadanes sobro la mala calidá del aire na ciudá.
Amás, va abrise un alderique sobro los allegamientos a presentar al Protocolu d’actuación n’episodios de contaminación del aire n’Asturies y va informase sobro la situación de los allegamientos presentaos a la revisión del Plan Xeneral d’Ordenación (PGO), pa les que güei se preslló’l plazu.
Con esti conceyu, abiertu a tola población tamién pretenden averar a la Plataforma a más ciudadanos esmolecíos pola calidá del aire, coles mires de convocar nueves movilizaciones.
La Plataforma contra la contaminación de Xixón ufierta charres sobro la cuestión n’entidaes y centros educativos. Apocayá aconceyáronse col Conseyu Sectorial de Mediu Ambiente del Conceyu de Xixón (xunta celebrada’l 13/11/2017) y tan aguardando rempuesta a la so solicitú pa caltener un alcuentru col Conseyeru responsable de Mediu Ambiente.
Llucía F. Marqués
This work is licensed under a Creative Commons Attribution 4.0 International License.
