Organizaciones de la Cataluña continental reclamen una autonomía dientro de la República de Francia

Los territorios trespirenaicos de Cataluña, los antiguos condaos del Rosellón y de la Cerdaña, tan separtaos del hestóricu Principáu de Cataluña dende’l Tratáu de los Pirineos de 1659 ente los gobiernos de Madrid y París. Sicasí caltuvieron la so identidá catalana anque ésta enxamas foi reconocida pola República francesa. De fechu anque la fastera constitúi un únicu departamentu territorial, la denominación d’esta unidá alministrativa evita cualisquier referencia hestórica o cultural: Pirineos Orientales.

Mientres na Cataluña peninsular desenvuélvese un procesu soberanista, los grupos patrióticos d’esta otra Cataluña, tan moviendo ficha pola reconocencia de la so identidá nacional dientro del estáu francés cola ellaboración d’un estatutu d’autonomía.

El partíu Unitat Catalana y el Comité pel Dret a l’Autodeterminació de la Catalunya Nord reivindiquen un status como rexón singular asemayáu al de la isla de Córcega, lo qu’implicaría la so separtación de l’actual rexón de Occitania, constituyida en 2016 nun procesu de reconfiguración territorial impulsáu dende París.

This work is licensed under a Creative Commons Attribution 4.0 International License.