La Casa Conceyu d’Ayer reconoz que financiare y permitiere una obra de fuerte impautu ambiental ensin llicencia municipal d’obres, nin informes favoratibles de los téunicos municipales
L’ampliación de nueve km d’una sienda peatonal (PR) dica convertila nuna pista de fasta siete metros d’ancho, dende la llocalidá de Llananzales fasta’l Puertu de Piedrafita nel conceyu d’Ayer fue realizada con maquinaria costiao illegalmente pola Casa Conceyu, pesia ser coscientes en tou intre de que carecía de llicencies pa la so realización.
Les obres d’ampliación de la pista tan siendo investigaes por dellos organismos polos delitos ambientales cometíos durante la so execución. Arramplóse con tola vexetación de les sos orielles, incluyendo árboles importantes nuna zona de viesca maura, siendo talaos indiscriminadamente fayas centenaries y castañales enormes.
La zona onde se llevaron a cabu les obres illegales ye d’una gran bayura biolóxica, con presencia d’osos y cantaeros d’urogallos que se vieron afeutaos, razón pola que’l Principado denegare en reiteraes ocasiones estes obres, depués financiaes pola Casa Conceyu d’Ayer.
Reclamóse a los estremaos organismos responsables qu’investiguen como se pudo executar esta obra con estos graves daños, ensin que la guardería nin el personal municipal parase les obres, que tresformaron una caleya nuna pista pal tránsitu de vehículos.
La recuperación de la fastera ye abegosa tres los graves daños carecios, pero ye de suma importancia que se repare na midida de lo posible y que se señalice la pista comu d’usu esclusivamente ganaeru, pa torgar l’usu masivu de vehículos na zona, impidiendo que La Casa Conceyu l’anuncie comu una pista pa turistes.
Pa la Coordinadora Ecoloxista de Asturies, que lleva tiempu denunciando estes obres, “Nun dexa de ser sosprendente que pesia la continua redución de les ganaderíes n’Asturies ten faciendose decenes de pistes con un coste de millones d’euros por tola montaña asturiana, cola esculpia d’un supuestu usu ganaeru, pasando por fasteres d’altu valir natural. Pistes que lluéu vemos que tienen toa triba d’usos menos el ganaeru, pesia qu’otros usos son illegales.”
Llucía F. Marqués
This work is licensed under a Creative Commons Attribution 4.0 International License.