Ya tan en marcha los preparativos pal V Díi de la Reciella, que tornará a aconceyar a les families pol asturianu l’ún d’ochobre, nel Muséu’l Pueblu d’Asturies
Tres de presentar a finales del mes pasáu’l so vídiu presentación col llema d’esta edición, “N’asturianu sumes” -tema de David Varela lleváu a vidíu por Pablo A. Quiroga– col qu’esti añu van promocionar la cellebración, presenten agora’l cartelu diseñáu por Marco Recuero en dos versiones estremaes, esquivando con aciertu l’alderique sobro estereotipos de xéneru y/o familiares.
El Díi de la Reciella ye una xornada d’arruelu familiar n’asturianu al que tol mundiu ta convidáu y que, como señala’l llema de la so quinta edición, suma cada añu más xente y más actividaes.
Pente elles destaca la segunda “Entaina”, prestosa carrera popular y familiar pol asturianu na que les estremaes xeneraciones que participen representen, pente rises y esporte, la tresmisión interxeneracional de la llingua y la cultura’l país.
Redaición InfoAsturies
This work is licensed under a Creative Commons Attribution 4.0 International License.
