La denuncia surdió de magar de la quexa d’un vecín na que denunciaba’l cambiu, per parte del conceyu d’Amieva, de la señalización na carretera AM-1, na que’l pueblu de Cirueñu pasaba a tar retuláu como “Cirieño”
Iniciativa pol Asturianu recuerda a la corporación del conceyu d’Amieva que la recuperación de los topónimos d’Asturies ta sofitada pola Llei 1/98, de 23 de marzu, d’usu y promoción del bable/asturianu, u se recueye que “les Alministraciones Públiques adecuarán de manera progresiva, d’acuerdu coles sos disponibilidaes presupuestaries y, en tou casu, al momento de la so renovación, les rotulaciones en víes publiques y carreteres, asina como de mapes y planos oficiales a les formes toponímiques establecíes nel Decretu correspondiente a la so aprobación” (Disposición final primera – Aplicación progresiva del Decretu 2/2007).
El 3 de xineru de 2007, publicóse en BOPA el Decretu 2/2007, pol que se determinen los topónimos del conceyu d’Amieva, onde apaez la nueva denominación oficial de Cirieñu (y del restu de llocalidaes del coneyu), sustituyendo a les enantes vixentes, si les hubiere.
Poro, Iniciativa pol Asturianu denuncia que’l conceyu d’Amieva ta infrinxendo les lleis y los decretos aprebaos pol Principáu d’Asturies nos que se recueye la recuperación de la toponimia tradicional del conceyu. Nesti sen, se insta al muérganu de gobiernu del conceyu y a tola corporación municipal a emplegar y a reivindicar l’usu la toponimia oficial d’Amieva en toles estayes, asina como la restitución d’aquella señalización y retulación de les localidaes nes víes públiques y carreteres qu’incumplan lo establecío nel Decretu 2/2007, pol que se determinen los topónimos del conceyu d’Amieva.
Redaición InfoAsturies
This work is licensed under a Creative Commons Attribution 4.0 International License.
