La división territorial d’Asturies en trés comunidaes autónomes facilita estos despropósitos.

La Comisión de Cultura del Congresu de los Diputaos vien d’aprebar sendes proposiciones non de llei pa esimir del pagu del Impuestu sobro Bienes Inmuebles (IBI) a horros, paneres y cabazos d’Asturies y Galicia a los que dende va pocu, ya inorando’l so calter de Bienes Muebles se-yos venía aplicando esti impuestu.

Por embargu, la propuesta aprebada escaezse de los horros y paneres asturianos que frutu de la división territorial d’Asturies en tres comunidaes, asítiense fuera de lo que dieron en nomar “Principado”, ello ye, los que s’asitien no qu’anguañu ye Cantabria y Castiella-Llión, colo qu’estos nun quedaríen llibres de tan inxustificable impuestu.

Ye de solliñar que si bien los horros asturianos cunten con perpocu sofitu y proteición del “Principado” , nes comunidaes vecines nun cunten con denguna midía de proteición, y cuasique podríemos dicir que son inoraos, cuando non perseguíos, pelos sos respeutivos organismos autonómicos, que ven nellos un recordatoriu de la so pertenencia a la mesma nación asturiana y l’artificiosidá de la incluxón d’esos territorios a les sos comunidaes autónomes.

This work is licensed under a Creative Commons Attribution 4.0 International License.