La propiedá incumple’l “deber de conservación” d’esti edificiu protexíu, poniendo en grave peligru esti importante patrimoniu, y el Conceyu tien de tomar midíes decidíes y urxentes pa salvaguardalu

Llucía Fernández Marqués

Conceyu Abiertu por Noreña solicitó al equipu de gobiernu que se tomen toles midíes que tenga’l Conceyu na so mano pa velar pol caltenimientu de les conocíes como “Cases de los zapateros”.

Esti conxuntu de viviendes foi construyíu alrodiu 1860 pol Dr. Dionisio Cuesta Olay y fueron adquiríes en 1910 pol reformista Pedro Alonso Bobes, pa taller y vivienda de zapateros, d’ehí que seyan conocíes como “Cases de los Zapateros” y enllace cola importante hestoria zapatera local. La so importancia ta fora de toa dulda y que, dende va muncho, nun esiste meyora sinón tolo contrario un fechu.

Ye parte importante del patrimoniu local, incluyíu nel catálogu urbanísticu de protección del conceyu como “claru esponente del paternalismu del que fueron oxetu los trabayadores a finales del s.XIX y principios del XX onde’l hixenismu foi una de les característiques más importantes” qu’ “amuesa unes intenciones estétiques infrecuentes nesti tipu de construcciones” y que dada la escasez d’esti tipu de construcciones en Noreña confier-y gran singularidá. Amás, a nivel asturianu, destaca por ser  unu de los escasos exemplos d’edificios civiles de dómina isabelina que se caltienen.

A finales del añu pasáu la oficina técnica municipal informó de que se-y unviaren a la propiedá delles notificaciones riquiendo, per un llau unes “midíes inmediates” y “unes midíes urxentes” y per otru, la presentación d’un “proyectu de consolidación”, con un informe esplicativu de setiembre de 2016.

Unos meses dempués l’equipu de gobiernu local informa de que nun esisten meyores na situación, colo que l’edificiu ta llegando a un puntu de magar el que ya nun habría torna.

Conceyu pidi que se tomen darréu midíes decidíes dende’l Conceyu, que s’esixa a la propiedá que realice les midíes que se-yos comunicó va meses y que de siguir cola so actitú refugando la so deber de conservación, el Conceyu empecipie los trámites pertinentes pa executales de forma subsidiaria, esto ye, realizar les obres el mesmu Conceyu y cargar los costos a la propiedá. Esta ye la única vía que queda pa evitar la so perda si la propiedá sigue desabriéndose poniendo en peligru’l patrimoniu, causando graves molesties a la vecindá, cola cera abarganada dende va años y el peligru que supón un inmueble abandonáu.

Según la Llei de patrimoniu asturiana l’incumplimientu de los requerimientos del Conceyu pal cumplimientu de les medies de caltenimientu de los bienes integrantes del patrimoniu Cultural d’Asturies, como ye’l casu de los elementos incluyíos en catálogos urbanísticos de protección, supondrá la imposición de multes coercitives. En casu de que los requerimientos pal cumplimientu del deber de caltenimientu nun sía atendíu, la llei contempla la posibilidá d’executar subsidiariamente les midíes que procedan, con cargu, a los responsables de la conservación. Nesti sentíu ye necesario recordar que nel Presupuestu de 2017 incorporóse, a propuesta de Conceyu Abiertu y con vistes a posibles problemes nesti sen, una partida p’actuaciones subsidiaries que podría dar una mínima cobertoria a l’actuación. Tampoco nun pue escaecese que según la mesma llei “ye causa d’espropiación l’incumplimientu del deber de conservación”.

This work is licensed under a Creative Commons Attribution 4.0 International License.