Foi una figura fundamental nel procesu de paz del Norte d’Irlanda
Martin McGuinness foi’l segundu de siete hermanos d’una familia de clase trabayadora nel barriu de Bogside en Derry (Londonderry, pa los protestantes). La esperiencia de la so infancia solía comparala cola del apartheid en Suráfrica: tuvo que dexar la escuela a los 15 años y nun pudo materializar les sos aspiraciones de trabayar como mecánicu por ser católicu.
En 1971, con 21 años yá yera’l númberu 2 de la xerarquía militar del IRA Provisional. En 1972 sería ún de los siete miembros de la organización armada que participaron nunes conversaciones secretes col Gobiernu británicu pa intentar negociar una tregua. Daquella empecipió la so amistá col “delegáu” por Belfast, Gerry Adams. Tamién sufriría la represión de manera directa, yá que foi deteníu y procesáu en dos vegaes por tenencia ilícita d’esplosivos y armamentu, y pola so militancia nel IRA.
Dende 1982 participó activamente na política del Sinn Feín. En 1997 sería escoyíu como diputáu nel Parllamentu del Reinu Uníu, anque enxamás s’integraría nél d’alcuerdo col criteriu astencionista del Sinn Feín. Foi’l máximu negociador en representación del bloque independentista nel famosu Alcuerdu de Vienres Santu de 1998.
Nel 2007 convirtióse en Viceministru Principal d’Irlanda del Norte, n’otru alcuerdu hestóricu col Democratic Unionist Party (DUP), dirixíu entós pol reverendu Ian Paisley, representante del unionismu más intransixente. El gobiernu de coalición caltúvose hasta la so dimisión el pasáu mes de xineru, como reacción a un escándalu de corrupción qu’afectó a la Ministra Principal, Arlene Foster, del DUP
This work is licensed under a Creative Commons Attribution 4.0 International License.
