La Coordinadora Ecoloxista d’Asturies denuncia l’estáu del mal llamáu Puntu Llimpiu d’Al.ler.

L’estáu d’abandonu nel que s’alcuentra esta infracadarma pública faela inservible no que cinca a recoyida estremada de residuos y reciclaxe. Ye fácil ver comu muebles, plásticos y basories delles van tomando los espacios naturales averaos, aportando cuasi a les orielles del ríu Al.ler, lo que ye especialmente dañible nel casu d’aceites y otros residuos llíquidos qu’ensin dubia finaran por aportar a les agües, coles inmediates consecuencies ecolóxiques.

Arriendes d’ello, dende la C.E.A denuncien que, pesi a ser un espaciu teóricamente vidioxixiláu, realícense nel Puntu Llimpiu toda triba de vertios industriales y urbanos, dellos de calter contaminante ya mesmo peligroso, ensin dalu control.

Poro, vienen de presentar denuncia ante la Conseyeria d’Infracadarmes, Ordenación del Territoriu y Mediu Ambiente, esperando que se tomen les midies afayaices darréu.

La tasa media de reciclaxe de los residuos sólidos urbanos n’Asturies cífrase nel doce por cientu, incluyendo nestos  los residuos de construcción, unes tases bien probes frente a les tases d’otros países, como Alemania que recicla alrodiu’l 80% de los sos residuos sólidos, el 60% de Suiza o el 30% recicláu n’España.

This work is licensed under a Creative Commons Attribution 4.0 International License.