Les/os trabayadores de centros de díe y crad d’Asturies lleven cuasi 1 añu ensin tener noticies de la patronal del seutor, pa la negociación d’un conveniu xustu, polo que siguen ensin xubíes salariales y con contratos precarios. Poro y como midía de presión pa que la mesa de negociación aconceye anantes de fin d’añu tienen convocaos tres paros parciales, los díes el 1,3 y 5 d’ochobre de 8:00 a 11:00 la mañá
Nesti conflictu atopense centros de díe privaos y centros de die y crad ascritos a servicios y drechos sociales del Principáu”.
Los centros de die son un recursu ca vegada más necesariu n’Asturies, dáu l’enorme problema d’avieyamientu de la población que, xuníu a la emigración forzosa de la mocedá, fai que seyan ca vegada más les persones mayores que tienen de recurrir a estos centros, nos que reciben una atención integral ya individualizada a les sos necesidaes básiques, terapéutiques y sociales.
L’aumentu tantu del númberu como de la edá de los usuarios, y por tanto’l so grau de dependencia, nos últimos años fai que los curiaos que precisen seyan ca vegada mayores, pero coles mesmes la precarización del seutor y los retayos que se tán careciendo faen más difícil ca díe caltener la calidá del serviciu.
Les trabayadores -esti ye un seutor tradicionalmente d’ámbitu femenín, polo que la gran mayoría son muyeres- denuncien que la esternalización del serviciu por parte del “Principado” y la contratación d’empreses privaes, derivó nun progresivu deterioru tantu del serviciu como de les condiciones llaborales “Lléven llucrandose enforma tiempu y nun podemos siguir con trabayos y sueldos precarios. Pa ello, precisamos un conveniu acordies a les nueses demandes, un conveniu propiu y dignu” reclamen.
Sicasí, la negociación coleutiva entá nun llegó a les cuasi quinientes trabayaores del seutor y nin siquier se costituyó una mesa de negociación.
Llucía F. M
This work is licensed under a Creative Commons Attribution 4.0 International License.
