Falta un mes pa que la música y la poesía aporten a Piloña na cellebración de los XII Alcuentros Poéticos Les Cuerries d’Espinaréu
Lo qu’entamó siendo una xunta íntima de poetes amigos terminó por convertise nun referente añal pa un bon númberu de poetes y amigos de la poesía y esti ye’l doceavu añu nel que, poetes consagraos y amateurs tán llamaos a participar nun recital que va tener llugar en Les Cuerries, un pueblu de monte desabitáu dende hai cuasi trenta años. L’alcuentru va ser los díes 14, 15 y 16 de setiembre y los actos van incluyir charres, llectures y música.
Anque’l programa completu entá nun ta concretáu, la organización yá adelantró dellos datos interesantes. Como cada añu, un poeta convidáu va allegase a Les Cuerries a realizar la llectura de les sos obres y compartir el momentu colos asistentes y nesti casu, va ser el poeta carbayón Fernando Beltrán, creador de 22 poemarios y 30 ensayos lliterarios, pero más conocíu por ser el fundador de “El Nome les Coses”, estudiu pioneru na creación de naming y denominaciones pa marques.
Sonia Estrada va encargase de poner la música cola so gaita y el dúu formáu por Íñigo y Aladro van ser los protagonistes del conciertu col que se presllen los actos del sábadu en Les Cuerries. El domingu espérase una conferencia del traductor y poeta Ricardo Pochtar Broffman, na qu’amosará aspeutos rellacionaos cola torna lliteraria en xeneral y cola poética en particular.
Pero ensin dulda el momentu estelar va ser la xubida a Les Cuerries y la posterior llectura conxunta de poesía.
Redaición InfoAsturies
This work is licensed under a Creative Commons Attribution 4.0 International License.
