La xusticia reconoz los abusos bancarios nes hipoteques, dando la razón al 99,3 per cientu de los asturianos que presentaron reclamación xudicial de los sos drechos
De les 413 sentencies notificaes fasta’l momentu dende’l mes de xunu, namás trés fueron favoratibles a les entidaes bancaries, evidenciando la xeneralización de les práutiques illegales, como les clausules suelu abusives o los gastos de tramitación d’hipoteques. Sicasí, son miles los asturianos que, por desconocimientu o falta de capacidá pa ello, entá nun reclamaron los drechos que-yos correspuenden. La PAH convidalos a averase a les sos xuntes pa informase del procedimientu a siguir pa xunise a les 1.890 demandes presentaes fasta agora.
Dende xunu, el xulgáu de primera Instancia nº 6 d’Uviéu tramitó 502 demandes, restando 1.388 por instruyir, notificó 413 sentencies, envalorando 410 y dando la razón a les entidaes bancaries en namás trés casos. Una inversión en tiempu y recursos que s’aforraría si la llei obligara a los bancos a devolver lo estafao a tolos afeutaos por defeutu, ensin necesidá de pasar pol xulgáu.
Llucía F. Marqués
This work is licensed under a Creative Commons Attribution 4.0 International License.
