Les escuelines pierden autonomía mientres sigue faltando plaza pa cientos de families

  • 19/11/2026

Educación concentra la xestión de la rede de 0 a 3 años y reparte’l tiempu de les direcciones ente centros de varios conceyos. La reorganización entra en vigor güei, 19 de payares, con una demanda que sigue per enriba de la ufierta en conceyos como Xixón y Siero. 

Apenes dos años depués de poner en marcha una de les grandes banderes del Gobiernu de Barbón, el Principáu da un pasu atrás na autonomía de xestión de les escuelines. En 2024, la regla xeneral daba dirección y xestión propies a los centros con tres unidaes o más. La resolución que publica güei’l BOPA eleva’l umbral a más de ocho, con excepciones cuando l’agrupamientu nun proceda por razones xeográfiques. 

La resolución afita 34 agrupaciones na rede autonómica y dexa cuatro centros con xestión económica y administrativa independiente. Tamién fixa nueve agrupaciones pa escueles municipales de Xixón y Uviéu con dirección docente. Na rede autonómica, cada grupu tien una sede que concentra la xestión económica y administrativa, y una dirección itinerante. Bimenes, Nava y Sariegu van compartir dirección, con sede en Sariegu. Proaza, Teberga y Quirós van facelo con sede en Proaza. 

El Principáu xustifica’l cambiu pola simplificación administrativa y la “racionalización del gastu”. Pa quien pasa de dirixir una escuela a encargase de dos o tres, aumenta’l trabayu de coordinación y súmense los desplazamientos. Pa los centros que pierden dirección propia, la perda d’autonomía de xestión ye inmediata. El BOPA nun fixa un mínimu d’hores de presencia en cada sede. Si nun se dota a les direcciones de más tiempu, los desplazamientos y la coordinación van restar hores d’atención a les plantiyes y a les families en cada centru. 

La reorganización inclúi a Somieu, que queda agrupáu con Belmonte de Miranda. A primeros de payares, una sentencia firme ordenó restituyir a la directora de la escuelina de Somieu nes funciones que tenía antes del relevu que siguió a la integración del centru na rede autonómica.

Asturies escolariza a menos d’un terciu de la reciella menor de tres años. Según un informe de CCOO, nel cursu 2024–2025 taba escolarizáu’l 31,9 % de la reciella menor de tres años n’Asturies, la tasa más baxa del Estáu. A los dos años, la tasa asturiana yera del 43 %. 

Nel recuentu d’almisión de mayu pal cursu 2026–2027, les 14 escuelines municipales de Xixón y l’autonómica Los Nuberinos sumaron 1.157 solicitudes contabilizaes, con 511 almisiones y 646 en llista d’espera. Cerca del 56 % quedó en espera nesi recuentu. En Los Nuberinos quedaron pendientes 105 de les 123 solicitúes. En mayu, SUATEA tamién denunció la dotación insuficiente de les escuelines proyectaes nel Rey Pelayo y en Santa Olaya, con namái dos unidaes previstes en cada centru. 

En Siero, 221 solicitúes quedaron ensin plaza nes llistes provisionales de mayu. La presión llevó a families de La Pola a reclamar una segunda llinia en Los Polesinos, con unes 39 places más. N’Uviéu, más de 400 families quedaron en llista d’espera en xunu de 2025, frente a 312 almisiones nos siete centros municipales. 

El 9 de payares, el Gobiernu cifró la rede autonómica en 95 centros operativos y 2.951 menores matriculaos, con una previsión de llegar a 127 centros en 70 conceyos. La resolución de güei emplega un recuentu de 84 escueles (once menos que va diez díes) y 223 unidaes. Mientres cientos de families siguen esperando plaza, Educación concentra la xestión y pon más centros a cargu de cada dirección compartida, ensin concretar cómo va garantizar que cada escuelina reciba’l tiempu d’atención que necesita

Comparti esta noticia

This work is licensed under a Creative Commons Attribution 4.0 International License.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

InfoAsturies

noticies d'Asturies
n'asturianu

Actualidá de los conceyos, llingua, cultura, economía, mediu ambiente y derechos sociales.

Quién somos y llinia editorial

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies