De San Esteban a Mieres y San Xuan, tres convocatories vecinales ponen el focu esta selmana na distancia ente les bateríes y les cases, na quema de residuos na térmica de La Pereda y nel destín de los sedimentos del puertu d’Avilés
El xueves, una reunión nun centru social d’Uviéu. El domingu, una asamblea abierta nun parque de Mieres y una recoyida de firmes al pie de la playa de San Xuan. Tres convocatories en sitios distintos, con una esixencia común de fondu. La xente que vive al llau d’estos proyectos quier tener voz a la hora de decidir qué s’instala, qué se quema y qué se deposita nel so entornu.
Falar d’una Asturies «vaciada» pue servir pa describir la perda de población. El problema vien cuando quien decide sobre’l territoriu trata esa perda como si-y diera vía llibre pa facer lo que-y pete. Una aldea con menos habitantes sigue teniendo cases, ganaderíes y vida vecinal. Y una cuenca minera o una ría industrial tienen memoria de quién tuvo que convivir coles emisiones y los residuos.
San Esteban pide que les bateríes s’alloñen de les viviendes
El xueves 19 de payares, a les 19:00 hores, Stop Baterías Asturias convoca una reunión nel Centru Social de San Esteban de les Cruces, n’Uviéu. Va informar del proyectu de normativa asturiana sobre almacenamientu eléctricu en bateríes y de les próximes movilizaciones. La reivindicación del cartelu ye aumentar la distancia ente los parques de bateríes y les viviendes.
La Comisión d’Urbanismu y Ordenación del Territoriu d’Asturies (CUOTA) aprobó inicialmente en setiembre les directrices pa estes instalaciones en suelu non urbanizable. El Principáu anunció una zona de salvaguarda de 200 metros pa protexer, ente otros elementos, el poblamientu rural dispersu. Según la Coordinadora Ecoloxista d’Asturies, el vecindariu de Los Arenales, Les Cruces y otros llugares del entornu presentó 584 alegaciones contra l’allugamientu de parques de bateríes na zona. En Lluanco, la Coordinadora denunció que siguen tramitándose dos parques de bateríes pese a les alegaciones.
Mieres lleva al parque la oposición a la quema de residuos
El domingu 22 de payares, a les 12:00 hores, el parque Xovellanos de Mieres va acoyer un actu vecinal contra la quema de basura na térmica de La Pereda. El programa anuncia una representación participativa, Rompe tus cadenas, una asamblea abierta y una invitación a sidre duce mayada nel momentu. La convocatoria pide llevar vasu.
La Plataforma Ciudadana contra la quema de basura na térmica lleva meses organizando actos públicos sobre la reconversión de la central de Hunosa, que prevé emplegar biomasa y combustible sólido recuperado procedente de residuos. En xineru, el Tribunal Superior de Xusticia d’Asturies anuló la declaración d’impactu ambiental de 2022. En abril, el BOPA publicó l’autorización previa y de construcción del proyectu y señaló que, daquella, la sentencia entá nun yera firme tres los pasos daos por Hunosa y el Principáu pa recurrila. A finales de setiembre, InfoAsturies dio cuenta del retrasu na información pública del nuevu estudiu ambiental de La Pereda.
San Xuan recueye firmes pol destín de los sedimentos del dragáu
El domingu 22 de payares, a les 13:00 hores, hai una reunión y recoyida de firmes nel bar de la playa de San Xuan, en Castrillón. El cartelu llama a movilizase contra’l recintu que l’Autoridá Portuaria d’Avilés proyecta al pie de la ría pa recibir parte de los materiales del dragáu. La convocatoria señala’l 23 de payares como fecha llende p’alegar. El trámite d’información pública del dragáu de la ría d’Avilés tien, según l’anunciu del BOE del 15 d’ochobre, un plazu de 30 díes hábiles a contar dende’l día siguiente a la publicación. Les alegaciones pueden presentase na sede electrónica o nel rexistru de l’Autoridá Portuaria.
La Coordinadora Ecoloxista d’Asturies ya presentó alegaciones. Según el colectivu, los análisis del material que se prevé dragar nel canal d’entrada y en zones interiores del puertu detectaron contaminación por metales como mercuriu, plomu y cadmiu. La Coordinadora cuestiona que parte d’esos materiales se trate nun recintu impermeabilizáu xunto a L’Espartal. Andecha Astur reclama garantíes ambientales pal dragáu y pide que s’evalúen los golores y el ruíu nes viviendes ocupaes de L’Arañón, San Xuan y L’Altu del Buscón.
Cada convocatoria lleva al debate una pregunta distinta. A qué distancia de les cases se pueden instalar les bateríes, qué se va quemar en La Pereda y cómo se van xestionar los sedimentos d’Avilés. Xuntándose, el vecindariu convierte lo que podía quedar como una preocupación de cada casa nuna esixencia pública a empreses y alministraciones. La xente que vive nos pueblos, nes cuenques y al pie de la ría reclama poder intervenir antes de que les decisiones queden tomaes.
This work is licensed under a Creative Commons Attribution 4.0 International License.
