• Portada
  • >
  • Sanidá
  • >
  • La fuelga médica entama n’Asturies y vuelve poner nel centru’l futuru de la sanidá pública

La fuelga médica entama n’Asturies y vuelve poner nel centru’l futuru de la sanidá pública

  • 16/11/2026

El Sindicatu Médicos Unidos convoca paros dende esti llunes 16 hasta’l 27 de payares pa reclamar un estatutu propiu y financiación pa meyorar les condiciones llaborales. Nel HUCA, los servicios mínimos de la mañana cubren el 35 % de la dotación médica de referencia.

La fuelga médica empezó a les ocho de la mañana d’esti llunes nos hospitales y centros de salú del SESPA. La convocatoria del Sindicatu Médicos Unidos (SMU), d’ámbitu estatal, inclúi al personal médicu residente. N’Asturies, la resolución de servicios mínimos cubre hasta les ocho de la mañana del sábadu 28 de payares.

La reivindicación principal ye un estatutu específicu pa la profesión médica. El sindicatu reclama financiación pa reforzar les plantiyes, reformar el sistema de guardies y remunerar toles hores de trabayu. Pide tamién que los servicios autonómicos abran meses de negociación específiques y cubran les necesidaes asistenciales ensin depender del sobreesfuerciu del personal.

Los servicios mínimos del SESPA varíen según el centru y el turnu. Nel HUCA, la resolución fixa 462 facultativos de los 1.317 de referencia pal turnu de mañana. El SAMU y l’atención continuada de primaria caltienen la dotación completa.

Les consultes, les pruebes diagnóstiques y les operaciones programaes pueden sufrir aplazamientos. L’impactu real va depender del siguimientu de la fuelga en cada serviciu. Los primeros balances del SESPA van permitir saber cuántes cites s’aplazaron y en qué centros.

Les necesidaes d’ampliación y meyora del serviciu públicu d’atención sanitaria son evidentes: por dar una cifra, el SESPA preslló xunetu con 23.633 persones pendientes d’una operación. En setiembre yeren yá 25.029, 2.606 más qu’un añu antes. La espera media supera los cien díes.

Al mesmu tiempu, cífrense en 11,3 millones d’euros el gastu públicu n’actividá sanitaria privada en 2025. Nesa partida entren derivaciones pa ciruxía y pruebes diagnóstiques. Otros 102,6 millones financiaron la rede concertada d’entidaes ensin ánimu de lucru, que presta servicios de forma estable. La fuelga pon una cuestión concreta delantre del presupuestu de 2027. ¿Cuántos recursos va dedicar el Principáu a cubrir vacantes, meyorar les guardies y aumentar l’actividá nos hospitales públicos? Saber cuántes operaciones y pruebes se deriven, a qué centros y con qué coste permitiría valorar si les derivaciones sirven pa resolver un atascu puntual o si’l SESPA acaba dependiendo d’elles de forma habitual, afondando na deriva privatizadora que marca la sanidá pública asturiana nes caberes décades.

 

 

Comparti esta noticia

This work is licensed under a Creative Commons Attribution 4.0 International License.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

InfoAsturies

noticies d'Asturies
n'asturianu

Actualidá de los conceyos, llingua, cultura, economía, mediu ambiente y derechos sociales.

Quién somos y llinia editorial

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies