• Portada
  • >
  • Mocedá y reciella
  • >
  • N’Ast esixe que l’asturianu tea presente en toles intervenciones de los conseyos de participación infantil

N’Ast esixe que l’asturianu tea presente en toles intervenciones de los conseyos de participación infantil

  • 16/11/2026
Xente mozo ente los participantes nel manifestamientu pola oficialidá del asturianu n’Uviéu.

Manifestamientu pola oficialidá del asturianu n’Uviéu, el 10 de mayu de 2025. InfoAsturies · CC BY 4.0.

El Gobiernu d’Asturies y los conceyos tienen que garantizar l’usu del asturianu en cada sesión, en cada intervención y en cada respuesta institucional.

Cola xida del Día Mundial de la Infancia, N’Ast esixe que’l reglamentu del Conseyu Autonómicu de Participación de la Infancia y l’Adolescencia y les normes de los conseyos municipales establezan l’asturianu como llingua de trabayu y garanticen la so presencia en toles sesiones. La nueva Llei d’Infancia y Adolescencia encarga al Gobiernu d’Asturies regular el funcionamientu del conseyu autonómicu. N’Ast reclama que’l reglamentu estableza esta obligación y que los conceyos la incorporen a les sos normes.

La presidencia, el personal téunicu y los representantes de les alministraciones han intervenir n’asturianu. Les respuestas orales y escrites han dase siempre n’asturianu, con independencia de la llingua na que se formulara la entruga o la propuesta. Les convocatories, los materiales, les actes y los acuerdos han tar disponibles n’asturianu dende’l momentu en que se comuniquen o s’espublicen.

Los neños, les neñes y los/es adolescentes han poder intervenir na llingua qu’escueyan. Cuando una intervención se faiga n’otra llingua, l’Alministración ha garantizar la interpretación al asturianu na mesma sesión. Les propuestes escrites han incorporase al acta na llingua orixinal y, cuando proceda, con una traducción al asturianu. Los medios y el costu d’esa traducción y d’esa interpretación correspuenden a l’Alministración.

«Cada intervención tien d’oyese n’asturianu y cada respuesta institucional tien que dase n’asturianu. Que se cumpla esta obligación nun pue depender de que los neños y les neñes tean que pidilo cada vez que tomen la pallabra.»

N’Ast esixe un calendariu públicu, una partida presupuestaria y personal con competencia acreditada n’asturianu. El Gobiernu d’Asturies ha garantizar un serviciu d’interpretación y traducción al que puedan recurrir tolos conceyos. Si una sesión se cellebra ensin cumplir estes garantíes, l’Alministración ha volver convocala y garantir que les intervenciones y les propuestes puedan tratase n’asturianu enantes d’adoptar los acuerdos.

«La falta d’oficialidá permite que, aconceyamientu tres aconceyamientu, seya la xente que fala asturianu la que tea que reclamar que la escuchen y-y respuendan na so llingua. Nun vamos aceptar que se siga cargando esa responsabilidá sobro la infancia. Esiximos que les alministraciones asuman dende agora les sos obligaciones y que se ponga igua a l’anormalidá democrática que supón la falta d’oficialidá de la nuesa llingua nacional.»

Lleer tamién n’InfoAsturies

Comparti esta noticia

This work is licensed under a Creative Commons Attribution 4.0 International License.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

InfoAsturies

noticies d'Asturies
n'asturianu

Actualidá de los conceyos, llingua, cultura, economía, mediu ambiente y derechos sociales.

Quién somos y llinia editorial

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies