L’autu conocíu esti xueves 12 de payares ordena precintar los llocales de Madrid, Burgos y Valladolid, bloquear les cuentes bancaries de la organización neonazi y bloquear los conteníos de los sos perfiles nes redes sociales.
La maxistrada que dirixe la investigación contra Núcleo Nacional dende Xixón ordenó’l cese de tola actividá de la organización. El xulgáu comunicó tamién a un representante del grupu que la organización queda investigada como persona xurídica.
La clausura y el precintu de les sedes de Madrid, Burgos y Valladolid impiden que Núcleo Nacional siga utilizando esos locales pa reunise, organizar actos o coordinar la so actividá. La suspensión cautelar afecta al conxuntu de l’actividá del grupu, tamién fuera d’eses tres sedes.
L’autu ordena amás el bloquéu de les cuentes bancaries de la organización, lo que-y impide disponer de los fondos d’eses cuentes, y el de los conteníos de los sos perfiles nes redes sociales, una de les víes que tenía pa difundir les sos convocatories. Estes midíes aplíquense a la organización mientras sigue abierta la causa.
Una causa que empezó en Xixón
La causa nació en Xixón tres los incidentes de febreru nes inmediaciones del colexu La Inmaculada, onde dellos mozos denunciaron agresiones. Núcleo Nacional convocara una concentración contra la retirada del anacrónicu monumentu de Simancas, dedicáu a los militares sublevaos en 1936.
Les primeres dilixencies partieron de la Fiscalía de Menores, ante la sospecha de captación de menores pa la causa. La investigación amplióse hasta desembocar na operación policial del 6 de payares, con catorce detenciones en siete ciudaes, tres d’elles n’Asturies. La causa investiga posibles delitos d’incitación al odiu, asociación ilícita y tenencia ilícita d’armes.
La investigación que llevó a les detenciones, n’InfoAsturies.
La Policía Nacional informó esti xueves de que practicó doce rexistros y de que s’incautó de más de venti armes de fueu, munición y armes prohibíes. La Policía atribúi al grupu la captación y l’adoctrinamientu de mozos, ente ellos menores d’edá, pa incitalos a cometer actos d’odiu y discriminación contra colectivos vulnerables.
Diez deteníos en llibertá provisional
Los diez arrestaos que declararon el domingu ante la maxistrada de Xixón quedaron ya en llibertá provisional. Dos son de Xixón y ún d’Avilés. Tienen retiráu’l pasaporte, tienen prohibío salir del Estáu español y han comparecer nel xulgáu tolos vienres.
Los otros cuatro pasaron a disposición de los xulgaos de guardia de los lugares onde los detuvieron. Les informaciones asoleyaes hasta güei nun detallen qué resolvió cada unu d’esos xulgaos.
La rápida puesta en llibertá provisional de diez de los deteníos provocó indignación nes redes sociales, onde dellos usuarios compararon la decisión xudicial colos casi seis años de prisión del raperu Pablo Hasél. Hasél ingresó en prisión en 2021 a raíz de publicaciones en Twitter. La mesma sentencia acusábalu por inxuries y calumnies, ente elles les referíes a Juan Carlos I nun cantar, cola peculiaridá de que bona parte de los asuntos a los que aludía la letra volvieron a l’actualidá años dempués, al conocese les investigaciones sobre’l rei eméritu que daben la razón a la lletra del cantante.
This work is licensed under a Creative Commons Attribution 4.0 International License.
