La fuelga xeneral del miércoles 11 de payares va acompañada de concentraciones y manifestaciones peles comarques. La marcha xunitaria va salir a les 18:00 de la plaza América d’Uviéu.

La llucha por una vivienda digna y unos salarios que permitan vivir va llevar mañana, miércoles 11 de payares, les reivindicaciones de la clas trabayadora a les cais d’Asturies.

Les convocatories asoleyaes recueyen ocho movilizaciones en siete llocalidaes, con cites al mediudía n’Uviéu, Xixón, Avilés, Llangréu, Mieres y La Pola Siero; una manifestación en Ribeseya a la una; y una marcha xunitaria n’Uviéu a les seis de la tardi.

La xornada xune reivindicaciones llaborales y sociales: l’accesu a la vivienda, la recuperación del poder adquisitivu, la contención de los precios y el refuerzu de los servicios públicos.  El plantegamientu de los convocantes parte d’un problema compartíu: tener emplegu nun garantiza poder pagar una casa y sostener un proyeutu de vida autónomu; el nivel de vida de la población lleva años cayendo. Poro, la movilización busca estendese más allá de los centros de trabayu, cola participación del texíu asociativu y de los comités populares de fuelga.

Al mediudía, les movilizaciones van averar la protesta a les distintes comarques. En Xixón, la cita va tener forma de manifestamientu dende la Casa Sindical. En Llangréu, la concentración va celebrase delantre la Casa Conceyu, neto que n’Avilés, Mieres y la Pola Siero. 

El manifestamientu de Ribeseya va entamar a les 13:00 na cai Palacio Valdés, 69, nel barriu d’El Pochacu. El Comité Popular del Oriente venceya la convocatoria cola perda de poder adquisitivu y cola proliferación d’apartamentos turísticos, y reclama que la población trabayadora pueda siguir viviendo nos sos pueblos.  La marcha llega tres una campaña comarcal contra la especulación inmobiliaria, el rentismu, la turistificación y la precariedá llaboral. El Comité anunció tamién la posterior participación na manifestación unitaria d’Uviéu, pa xuntar les reivindicaciones del Oriente coles del restu d’Asturies.

Estes convocatories formen parte del llamamientu de los comités populares a ocupar les cais pela mañana, antes de confluyir na marcha asturiana de la tarde. La confluencia de la xornada va ser a les 18:00 na plaza América d’Uviéu. El llamamientu busca reunir a quienes participen nes movilizaciones comarcales y a los distintos sectores que reclamen vivienda y salarios dignos, nuna respuesta colectiva al encarecimientu de la vida.

La xornada va tener una convocatoria específica nel ámbitu universitariu. El Conseyu d’Estudiantes de la Universidá d’Uviéu convocó un paru académicu xeneral pal 11 de payares, coincidiendo cola fuelga. L’órganu estudiantil señala que les dificultaes pa pagar una vivienda y les condiciones llaborales inflúin nel accesu y na permanencia nos estudios, especialmente ente quienes tienen que desplazase o compaxinar formación y emplegu.

Recordar tamién qu’aparte de la fuelga llaboral ta convocada una fuelga de consumu, ello ye, que se llama a la población a nun facer compres nin xestiones a lo llargo de la xornada. 

This work is licensed under a Creative Commons Attribution 4.0 International License.