La revista científica de l’Academia de la Llingua Asturiana presenta una nueva entrega dedicada a la investigación llingüística, la lliteratura y la traducción, con estudios que refuercen la presencia del asturianu nel ámbitu académicu internacional.
L’Academia de la Llingua Asturiana (ALLA) vien d’asoleyar el númberu 135 de Lletres Asturianes, correspondiente al mes d’ochobre de 2026. La espublización, que lleva más de cuatro décades siendo una referencia pa los estudios filolóxicos y culturales asturianos, presenta seis nuevos trabayos d’investigación, amás d’otres contribuciones, reseñes bibliográfiques y información sobre l’actividá académica y cultural del país.
La nueva entrega vuelve poner de manifiestu la diversidá y vitalidá de la investigación venceyada al asturianu, una llingua que sigue xenerando conocimientu científicu y estableciendo rellaciones coles principales corrientes de la llingüística y la lliteratura internacionales. La revista da continuidá al trabayu científicu recoyíu nel númberu 134, espublizáu en marzu, que se centraba especialmente nos estudios romanistes y toponímicos.
Los seis estudios incluyíos na seición principal aborden cuestiones mui estremaes, que van dende la educación y la sensibilidá intercultural hasta la traductoloxía, la lliteratura comparada y l’análisis gramatical.
Ángel Huguet-Canalís, Xosé A. González-Riaño, Cecilio Lapresta-Rey y Fernando Senar-Morera firmen la investigación «Sensibilidad intercultural y diversidad: el posicionamiento del futuro profesorado en Asturias», una cuestión especialmente relevante nun sistema educativu nel que la pluralidá llingüística sigue siendo oxetu d’alderique.
Pela so parte, Raquel Fernández Menéndez estudia’l papel de les lliteratures pequeñes na lliteratura comparada, con especial atención a l’autotraducción y los usos menores nes llingües mayoritaries, nel trabayu «Les lliteratures pequeñes na lliteratura comparada: l’autotraducción y los usos menores nes llingües mayores».
Miguel Fernández Díaz dedica’l so estudiu a «Cuestiones de traductoloxía aplicaes al asturianu», mentes qu’Imanol Suárez-Palma investiga la reduplicación verbal como mecanismu d’afirmación enfática nel artículu «Reduplicación verbal de afirmación enfática en asturiano».
La dimensión internacional de la publicación queda reflexada nel estudiu de Michela Russo, «The mass/count distinction and metaphony in Asturian and Central-Southern Italian dialects», que compara la distinción ente nomes de masa y cuntables y los fenómenos de metafonía nel asturianu y nos dialeutos del centru y sur d’Italia.
Completa esta seición Pascual Riesco Chueca, cola investigación «Observaciones sobre léxico y etimología al sur del dominio asturianoleonés», que contribúi a ampliar la conocencia del patrimoniu llingüísticu compartíu.
Traducción, bibliografía y actualidá cultural
La seición «D’otramiente» inclúi un artículu de Robin Munby sobre traducción lliteraria, centráu en The Posthumous Book of Shahrazad, mentes que l’apartáu de reseñes bibliográfiques recueye una contribución de Fernando Sánchez Miret sobre’l volume coleutivu dedicáu al profesor José Enrique Gargallo Gil.
La revista incorpora tamién una amplia seición de «Notes y anuncies», que documenta buena parte de l’actividá de l’Academia a lo llargo de 2026.
Ente los acontecimientos recoyíos figuren el XLVII Día de les Lletres Asturianes, la presentación del Pequeñu Atles Llingüísticu d’Asturies, la reedición de les Normas ortográficas del eonaviego, les actividaes de la Universidá Asturiana de Branu y los alcuentros académicos internacionales.
Dalgunes d’estes iniciatives yá tuvieron siguimientu n’InfoAsturies, como la presentación y les actividaes de la Universidá Asturiana de Branu de 2026, nes que se trataron cuestiones rellacionaes cola formación docente, la lliteratura asturiana y les nueves ferramientes tecnolóxiques. Nesa mesma edición presentóse tamién el proyeutu del Pequeñu Atles Llingüísticu d’Asturies, dedicáu a documentar la diversidá llingüística del país.
La seición «Llibrería Asturiana» completa’l volume con una revisión de les novedaes editoriales n’asturianu y n’eonaviegu, amás d’otres publicaciones d’interés cultural y llingüísticu.
Fundada en 1982, Lletres Asturianes ye una de les principales publicaciones científiques dedicaes a les llingües y cultures d’Asturies. La revista espublízase dos veces al añu, en marzu y ochobre, y sigue un modelu d’accesu abiertu diamante, polo que nun cobra nin a les persones qu’investiguen y publiquen nin a quien consulta los sos conteníos.
Los trabayos d’investigación pasen per un procesu d’evaluación esterna por pares en réxime de doble ciegu, acordies colos criterios de rigor y independencia científica.
La continuidá d’esta publicación representa una contribución importante a la normalización del asturianu nel espaciu universitariu y científicu. Frente a les dificultaes que sigue atopando la llingua pa algamar una reconocencia institucional plena, la producción investigadora demuestra la so capacidá pa ser oxetu y vehículu de conocimientu especializáu.
El númberu 135 de Lletres Asturianes pue consultase llibremente en REUNIDO, la plataforma de revistes científiques de la Universidá d’Uviéu, y na web de l’Academia de la Llingua Asturiana.
This work is licensed under a Creative Commons Attribution 4.0 International License.
