La policía torgó el pasu de cientos de manifestantes al mitin.

Cientos de persones movilizáronse esti miércoles contra la visita del presidente de Vox. La protesta entamó nel Parche y estendióse peles cais próximes al mitin de Camposagrado, onde’l dispositivu policial cortó los accesos. La xornada acabó con cargues y tres persones deteníes

Avilés respondió na cai a la presencia de Santiago Abascal. La convocatoria d’Asturies Antifacista baxo’l lema «Paremos los pies al facismu» aconceyó esti miércoles 21 d’ochobre a más d’un  millar de persones, con una destacada presencia de xente mozo, pa espresar el refugu al discursu y les polítiques de la ultradrecha.

La concentración taba convocada a les 18:30 nel Parche, media hora enantes del actu de Vox na plaza de Camposagrado. Dende la plaza del Conceyu, grupos de manifestantes averáronse al mitin per distintes cais del cascu históricu, onde atoparon los accesos cortaos pola Policía Nacional.

La tensión foi creciendo nes inmediaciones del actu y acabó en cargues policiales contra los concentraos antifacistes, con varios firios ente los manifestantes y tres detenios.

El Sindicatu d’Estudiantes foron los primeros en denunciar l’actuación de descomanada violencia contra quienes protestaben pola presencia d’Abascal, manifestando’l so refugu a normalizar los discursos facistes. La organización venceyó lo asocedío cola intervención policial que se produxera pela mañana n’A Coruña, tamién durante una movilización contra’l dirixente de Vox.

Les tres detenciones nun borren el motivu de la convocatoria: facer visible la oposición social al racismu, al machismu y al retrocesu de drechos que defende la formación verde, comu denuncien los colectivos antifacistes. La movilización avilesina forma parte d’una respuesta que lleva meses espresándose n’Asturies, tanto frente a les visites de dirixentes de la ultradrecha como ante les agresiones y les campañes contra colectivos vulnerables.

N’agostu, La Florida movilizóse contra’l racismu y n’apoyu a los menores d’acoyida. En setiembre, miles de persones respondieron n’Uviéu a l’agresión facista contra dos militantes d’AMA. Más recientemente, l’acampada pola vivienda de La Escandalera denunció agresiones d’un grupúsculu facista.

Lo asocedío ayeri n’Avilés dexa, amás de les tres detenciones confirmaes, una denuncia pública de l’actuación policial contra la protesta antifacista en toa Europa.

This work is licensed under a Creative Commons Attribution 4.0 International License.