L’antropólogu y escritor va conversar con Inaciu Galán sobre la so trayeutoria na Academia’l miércoles 21 d’ochobre, a les 19:30 hores. L’actu va tener entrada de baldre hasta completar un aforu de 30 persones
L’Academia de la Llingua Asturiana va dedicar la quinta sesión de los «Alcuentros na ALLA» a Roberto González-Quevedo, una figura con una llarga trayeutoria nel estudiu de la cultura y na defensa de la llingua asturiana. La cita va celebrase’l miércoles 21 d’ochobre, a les 19:30 hores, nel llar social de la institución, n’Uviéu.
L’alcuentru va entamar con una conversación ente González-Quevedo ya Inaciu Galán, na que l’académicu va compartir camientos y vivencies del so llabor na institución. Dempués, les persones asistentes van poder intervenir con entrugues y comentarios, orientando l’alderique hacia les cuestiones que más interés-yos despierten.
Nacíu en Palacios del Sil en 1953, Roberto González-Quevedo ye antropólogu, filósofu y escritor, doctor n’Antropoloxía Cultural pola Universidá Autónoma de Madrid y en Filoloxía Hispánica pola Universidá d’Uviéu. Entró na Academia en 1981 y, dende entós, vien dedicando una parte fundamental de la so actividá al estudiu y la defensa de la cultura y la llingua asturianes.
Una de les principales espresiones d’esi llabor ye la direición de Cultures. Revista Asturiana de Cultura, publicación dedicada a la investigación antropolóxica y etnográfica. La revista amiesta l’atención a la realidá asturiana cola apertura al estudiu d’otres cultures, faciendo del asturianu una ferramienta de conocencia y divulgación científica.
La sesión da continuidá a un ciclu que tuvo a Francisco Llera como protagonista de la cuarta edición, celebrada en xunu. La propuesta busca averar al públicu’l trabayu de los integrantes de l’Academia y dar a conocer les esperiencies, proyectos y reflexones qu’acompañen la so xera.
Con esti formatu participativu, la institución abre un espaciu pa conocer de cerca a quienes contribúin al estudiu y la promoción de la nuesa llingua. La entrada ye de baldre hasta completar l’aforu, llendáu a 30 persones.
This work is licensed under a Creative Commons Attribution 4.0 International License.
