Opinión: Llucía Fernández Marqués

Anueche golpeó les redes la muerte de Mari Carmen Abascal -tien coña la coincidencia d’apellíu- más que nada, pol simbolismu que guaria esti final de la so hestoria, depués de ser el detonante de les movilizaciones que reclamen una vivienda digno y asequible

Mari Carmen, 87 años, morría dos selmanes depués de ser desfiuciada de la vivienda na que llevaba más de setenta años viviendo; facíalo nel hospital, incumpliendo asina’l so deseyu, tan simple como morrer en so casa. Nun morrió, matáronla, ye la rempuesta unánime de tolos que ficieron suya la bandera del drechu a un llugar nel que vivir. Nun hai que ser un xeniu pa decatase de que les consecuencies de qu’una persona vulnerable pierda la so casa son devastadores.

Pero Mari Carmen nun ye la primera y muncho mos tememos, nun va ser la cabera de les víctimes de l’avaricia de los rentistes.

El pasáu Agostu, n’Uviéu, un home de 47 años que taba pendiente de ser desfiuciáu d’una vivienda yá embargada prendió fueu al pisu y depués tiróse pela ventana al patiu de lluces. Sobrevivió porque unos tendales frenaron la cayida y acabó ingresáu nel HUCA.

En setiembre Olga Matute, 54 años (Hospitalet de Llobregat) suicidóse cinco meses depués de ser defiuciada de la vivienda onde llevaba más de veinte años. N’Ochobre de 2025, en Torremolinos un home d’80 disparóse cuando la comisión xudicial acudió a su casa pa executar el desaloxu deriváu d’una execución hipotecaria. En xunu del mesmu añu, en Barcelona, un home de 73 años foi desfiuciau, volvió a entrar na vivienda y, al regresar la policía, suicidóse: ya dixere que se quitaría la vida si lu echaben. Un mes mas tarde, n’Alicante foi una mujer ensin recursos la que protagonizó un suicidiu darréu ser echada del pisu onde viviere los caberos venti años… y asina podríemos seguir mes a mes fasta los primeros suicidios documentaos por esti motivu, los de Miguel Domingo, de 53 años y Amaia Egaña, de la mesma edá, ambos en Payares del 2012.

Los suicidios coincidentes col momentu del desfiuciu son la causa de muerte por desaloxu más evidente, pero son namai la pica d’un iceberg del que nun hai -o nun se faen públicos- datos abondos. L’estrés, la depresión, vivir na cai, son factores qu’evidentemente multipliquen los riesgos, especialmente en persones vulnerables y/o enfermes. Hai antecedentes documentaos abondos como pa saber que someter a persones vulnerables a procesos de perda de vivienda puede tener consecuencies estremes. Nun son namás procedimientos xudiciales nin disputes sobre una propiedá, son vides humanes lo que ta en xuegu.

L’alderique nun ye si una empresa propietaria tien drechos xurídicos sobre un inmueble del que ye propietaria.Tienlos. L’alderique ye si esos drechos tan perriba del drechu a la vida de les persones.

Nun escaezamos que darréu de munchos desahucios, lloñe de tar la necesidá d’una persona que renta la so segunda vivienda, ta la cobicia de fondos utre, grandes empreses o multipropietarios que busquen aumentar la rentabilidá de los sos inmuebles a cualquier costu.

El pasáu añu executáronse n’Asturies 603 salies forzaes d’un domiciliu, según datos del Conseyu Xeneral del Poder Xudicial. Fue un añu pésimu, con 14,9 casos por cada 100.000 habitantes, la cuarta peor proporción del estáu. N’Asturies la cifra de suicidios nun baxa nos caberos años, alredor d’un cada 55 hores.

This work is licensed under a Creative Commons Attribution 4.0 International License.