Mieres, Llaviana, Villaviciosa, Avilés, Xixón y Uviéu participen los díes 3 y 4 d’ochobre nel Ecomapéu «¡Equí falta un árbol!», una iniciativa ciudadana que pretende identificar alcorques vacíos, árboles secos y espacios urbanos nos que l’arboláu nun dispón de condiciones afayadices pa desendolcase.

Seis conceyos asturianos van participar esta fin de selmana nuna aición ciudadana destinada a poner sobre’l mapa les faltes del arboláu urbanu. Mieres, Llaviana, Villaviciosa, Avilés, Xixón y Uviéu son los conceyos nos que voluntarios participarán nesta campaña.

La propuesta parte d’una idega cenciella: percorrer cais, parques y xardinos y señalar aquellos puntos onde falta un árbol o onde l’arboláu existente presenta problemes. Les persones participantes van poder rexistrar en ecomapa.org alcorques vacíos, tueros, árboles secos o exemplares que malpenes disponen d’espaciu pa los sos raigaños, incluyíos aquellos espacios pa árboles cubiertos con cementu o resines. Los datos van poder consultase nel mapa a lo llargo del fin de selmana.

N’Asturies, la iniciativa pretende facer visible una cuestión que ye especialmente evidente en munchos espacios urbanos: la perda d’arboláu, la falta de reposición d’exemplares eliminaos y les dificultaes que tienen munchos árboles pa medrar nes cais.

Les organizaciones y persones voluntaries implicaes nos seis conceyos consideren que’l mapeu va permitir identificar de manera concreta onde tán los problemes y disponer d’información cola que reclamar actuaciones a los respectivos conceyos. L’oxetivu nun ye namás contabilizar árboles ausentes, sinón detectar deficiencies na cobertura arbórea y na manera na que se caltién y planifica l’arboláu urbanu.

La importancia d’estos espacios aumenta amás nuna situación d’aumentu de les temperatures. Los árboles proporcionen solombra, contribúin a rebaxar la temperatura de les cais, retienen parte de les partícules presentes nel aire y sirven d’abellugu y alimentu pa distintes especies. Les entidaes convocantes recuerden que la presencia d’arboláu tien tamién una incidencia directa na habitabilidá de los barrios y nos espacios públicos.

Pero’l problema nun se reduz a plantar más. Los impulsores de la campaña reclamen que se tenga en cuenta la superficie de cobertura vexetal, que los árboles dispongan de suelu y espaciu suficiente pa los sos raigaños, que s’escueyan especies adaptaes a cada espaciu y que s’eviten les podes severes.

La campaña tien amás una dimensión a llargu plazu. Un árbol plantáu güei precisa décades pa algamar el tamañu y la copa necesarios pa proporcionar una solombra significativa. Por eso, les organizaciones planteguen que les decisiones que se tomen agora van determinar en bona midida la calidá de los espacios urbanos de les próximes décades.

L’Ecomapéu da continuidá a la Termometrada Estatal de 2025, una iniciativa na que participaron 67 conceyos —seis d’ellos n’Asturies— pa medir y denunciar los efectos de les islles de calor nes zones urbanes. Nesta ocasión, la mirada céntrase directamente nel arboláu y nes posibilidaes d’ampliar la infraestructura verde.

Nos seis conceyos asturianos que participen, el resultáu va permitir facer una radiografía ciudadana d’espacios concretos nos que falten árboles o nos que’l que sobrevive precisa meyores condiciones. Pero la cuestión afecta igualmente al restu de conceyos d’Asturies: con temperatures cada vez más altes y episodios de calor más frecuentes, disponer d’árboles sanos, solombra y zones verdes conviértese nun elementu cada vez más importante de la planificación urbana.

This work is licensed under a Creative Commons Attribution 4.0 International License.