Naide tomó mui en serio les declaraciones llingüísticamente llibertaries de Queipo, pero les contradicciones tan ehí ya’l PP nun ye l’únicu que cae nelles.
La llectura n’asturianu d’una moción de Compromisu provocó un recesu nel últimu Plenu de Ḷḷena, dempués de que’l PP reclamara escuchala tamién en castellanu y cuestionara’l derechu a utilizar la llingua asturiana na sesión. L’episodiu contrasta col discursu defendíu’l pasáu mes de mayu pol presidente del PP d’Asturies, Álvaro Queipo, cuando reclamó que l’asturianu pudiera utilizase «en llibertá».
La llectura íntegra n’asturianu d’una moción sobre accesibilidá presentada por Compromisu convirtióse n’unu de los momentos más tensos del últimu Plenu del Conceyu de Ḷḷena.
Tres acabar la intervención, el PP pidió que la propuesta volviera lleese en castellanu. Compromisu negóse a repetila, recordó que si queríen lleela, la moción taba rexistrada tamién en castellanu -aunque nun ye obligatorio-, y defendió’l drechu del conceyal a intervenir n’asturianu.
Los representantes populares insistieron en que teníen drechu a escuchar la moción en castellanu y llegaron a alegar que podíen nun entender l’asturianu. La discusión obligó a interrumpir momentáneamente la sesión y foi necesario consultar la normativa municipal.
Tres el recesu, la Presidencia confirmó que la Ordenanza Municipal pal usu de la Llingua Asturiana de Ḷḷena ampara’l drechu a espresase n’asturianu nos plenos. Pese a ello, el representante del PP caltuvo la so protesta y defendió que’l castellanu ye la llingua oficial del Estáu.
Durante la discusión llegaron a facese comparances ente utilizar l’asturianu y utilizar el “grecochipriota” y los populares llegaron a plantegar l’abandonu de la sesión pola utilización de la llingua asturiana.
La polémica de Ḷḷena resulta especialmente significativa al comparala col discursu defendíu pola dirección autonómica del propiu Partíu Popular pocos meses anantes.
El 8 de mayu de 2026, coincidiendo col Día de les Lletres Asturianes, Álvaro Queipo volvió refugar la oficialidá, pero presentó la posición del PP como una defensa de la protección y del “usu en llibertá” del asturianu, afitando que’l PP tenía’l “máximu compromisu” cola so protección y con que pudiere ser utilizao llibremente por quien quisiere.
Nun yera tampoco una formulación nueva. En xineru de 2024, Queipo yá defendiera que cualquier asturianu que quisiere utilizar la so llingua tenía de poder facelo “con total llibertá”; y nel debate estatutariu de 2025 el PP volvió resumir la so posición como “llibertá pal so usu, promoción pa la so conservación y voluntariedá pal so aprendizaxe”.
Si la posición oficial ye que cualquier persona pueda utilizar l’asturianu llibremente, el casu de Ḷḷena obliga a entrugase hasta ónde llega esa llibertá cuando l’usu se produz nun plenu municipal.
Amás, Ḷḷena cuenta con una ordenanza municipal que regula l’usu del asturianu y que foi precisamente la normativa consultada durante’l recesu del Plenu. La interpretación de la Presidencia foi que la ordenanza amparaba la intervención del conceyal n’asturianu.
Sicasí, la distancia ente los discursos de les direcciones de los partíos y la práctica de dalgunos de los sos gobiernos o representantes municipales nun ye esclusiva del Partíu Popular.
Unu de los exemplos más claros ta n’Illas, conceyu gobernáu por Izquierda Unida.
En 2025, l’Ayuntamientu requirió que se subsanaren solicitudes redactaes n’asturianu alegando que la llingua nun ye cooficial. La documentación del propiu procedimientu confirma que l’alcaldía utilizó esi argumentu pa considerar defectuoses les solicitudes y llegó a archivar una d’elles al nun presentase posteriormente n’otra llingua.
N’otru expediente, el Conceyu volvió argumentar que l’asturianu nun ye cooficial y que la Llei d’Usu solo resultaría aplicable al Principáu, interpretación que acabó llegando al Conseyu de Transparencia. La negativa a tramitar escritos n’asturianu nel Conceyu d’Illas vien produciéndose dende años atrás.
La contradicción ye evidente cola llinia política xeneral d’IU, formación que defende la oficialidá y l’ampliación de los derechos llingüísticos.
Nel casu del PSOE, les incongruencies tuvieron formes distintes y fueron variando col tiempu. La FSA y el Gobiernu asturianu defenden actualmente la oficialidá, pero la propia historia institucional socialista presenta bayura d’ataques al asturianu, retrasos na tramitación de la oficialidá y decisiones que nun sofitaron precisamente la normalización llingüística.
This work is licensed under a Creative Commons Attribution 4.0 International License.
